Buxoro davlat universiteti iqtisodiyot va turizm

1.2. Mehmonxona xizmatlari raqobatbardoshligi ko‘rsatkichlariga xodimlarning ta’siri
Katta mehnat sarfini talab qiladigan mehmonxonalarda insonlar uning eng muhim aktivi hisoblanadi. Binobarin, ularni boshqarish mazkur qudratli aktivlarni muvofiqlashtirish vazifasini bajaradi, korxonalarning boshqaruvi tizimi va uslubini rivojlantirish jarayoniga katta hissa qo‘shadi. Ko‘pgina mehmonxonalarda xodimlarni korxonaning yordamchi komponenti deb hisoblab, ularni boshqarishda tegishli darajada e’tibor berilmaydi. Ammo bu noto‘g‘ri, chunki mehmonxonalarda xodimlar korxonaning, pirovard mahsulotning ajralmas tarkibiy qismi hisoblanadi va buning uchun korxonalar mijozlardan haq oladi. Masalan, mehmonxonada mehmon nafaqat yashash, xavfsizlik, tozalik uchun, balki mehmonxona xizmatchilarining e’tibori uchun ham haq to‘laydi.. Turizm korxonalarining uzoq muddatli istiqbolida xodimlardan biznesning bosh strategiyasi sifatida foydalanishning samaradorligini oshirishga e’tibor kuchaymoqda. Turizm industriyasiga bag‘ishlangan chet el adabiyotlarida so‘nggi yillarda mehnat resurslari bilan bog‘liq jarayonlar, ular faoliyati oldida turgan muammolar, huquqlari va kelajagi haqida ko‘p yozilmoqda. Mamlakatimizda bugungi kunda turizm sohasida 200 mingdan ortiq kishi mehnat qilmoqda. Xodimlarni boshqarishning tabiati biznesning samaradorligi va uning muayyan a’zolari yutuqlarini ham belgilashi lozim bo‘ladi. Ma’naviy muhitni, mehnatdan qanoatlanishni yaxshilash kabi his qilinmaydigan foydani ham hisobga olish kerak. Xodimlarni boshqarish xizmatining oqilona siyosati xodimlar hulq–atvori, malakasi va korxonaning samarali faoliyatiga ijobiy ta’sir ko‘rsatishi mumkin. Mehmonxona xizmatlarining raqobatbardoshligi ko‘rsatkichlariga xodimlarining ta’sirini tahlil qilishga haraka t qilamiz. Zaruriy mutaxassislarni maqsadli ravishda izlash va ularni ishga jalb qilish zamonaviy kadrlar bozorining dolzarb masalalaridan biri bo‘lib qolmoqda. Hozirgi paytda turizm sohasida malakali kadrlar salohiyatini shakllantirishning murakkabligi quyidagilardan iborat bo‘lmoqda: - mehmonxonalarda yangi vositalar va tizimlarni yaratib, yangilikni joriy eta oladigan dasturlovchilar, tizimli administratorlar, innovatsion loyiha menejerlari kabi malakali mutaxassislar yetarli emas; - g‘arb mijozlari uchun odatiy hisoblangan yuqori darajadagi servis ya’ni, xushmuomalalik, mas’uliyatlilik, jonkuyarlikning pastligi ham turizm va mehmonxona faoliyatini murakkablashtiradi. Mehmonxona sohasida xodimlarni boshqarish xususiyatlarining tahlili natijasida iqtisodiyotning hech bir yuqori daromadli tarmoqlarida shaxslararo munosabat mehmonxona biznesidagidek muhim rol o‘ynamasligi va aynan xizmat ko‘rsatish sohasida hanuzgacha kadrlarini boshqarishning optimal varianti ta’minlanmagan va xalqaro me’yorlarga to‘g‘ri keladigan zaruriy servis darajasini tashkil etish ham yo‘lga qo‘yilmaganligi ma’lum bo‘lmoqda.³