ЭЪТИҚОД*
М. Маҳмудов,
Бошланғич таълим педагогикаси ва услубиёти
факультети декани
С. Авезов
факультет ўқитувчиси
Инсон руҳияти-кенг олам. Унинг сир-асрорлари-ю, ботиний дунёсини кашф этмоқ неча –неча шоир-у, олимларнинг ҳаёт мазмунига айланган. Улуғ ҳинд халқи нақлларидан бирида: “Ҳар бир ҳаракат – одатга, одат-характерга айланиб, инсон умрини ташкил этади” дейилади. Шундай экан, оламнинг улуғ меҳвари бўлган инсон руҳиятини ўрганиш – уни ўзи яшаб турган заминга эътиқоди, билъакс, интелектуал хусусиятининг қай даражада эканлигини билмай туриб, ҳаётга, жамиятга муҳаббатини ошириш мураккаб жараён. Ана шундай ҳаётий мезоннинг илмий тамойилини яратиш учун курашаётган, бу кенг жабҳада ўзининг чексиз эътиқоди билан салмоқли ҳисса қўшиб келаётган ёш руҳшунос олимларимиздан бири – Шарифжон Рамазонович Баротовдир.
Шарифжон 1983 йилда БДПИнинг педагогика ва бошланғич таълим услубиёти факультетини имтиёзли диплом билан тугатди. Собиқ талабадаги илмга чанқоқлик, ўзига беқиёс талабчанлик, шижоаткорлик факультет раҳбарияти эътиборини қозонди. У шу даргоҳга ишга қабул этилди: руҳшунослик фанидан талабаларга сабоқ ўргатди. Ёш ўқитувчидаги илмга ташналик, иқтидорни сезган факультет декани уни 1985-1987 йилларда Москвадаги Педагогика Фанлар Академиясига қарашли ва умумий ва педагогик технология институти аспирантурасига юборди. 1990 йилга қадар ёш, тинимсиз изланувчан эътиқодчи 15 ортиқ илмий мақолаларини матбуотда эълон қилди. Бу изланишлар натижаси ўлароқ, 1990 йилнинг 13 ноябрида профессор Э.А.Фарапонова раҳбарлигида “Кичик ёшдаги ўқувчиларда меҳнатга фаол муносабатларни шакллантиришнинг руҳий – педагогик асослари” мавзусида руҳшунослик фанлари номзоди даражасини олиш учун ёзган диссертациясини муваффақиятли ҳимоя қилди.
Бу муваффақият уни янги илм сарчашмалари томон етаклади. Ҳар бир жамоат ташкилотларда фаолллик кўрсатаётган шахсларнинг интелектуал хусусиятларини ўрганиш, маънавий оламини бойитиш, шу аснода жамиятдаги ўрнини белгилашда унга руҳий хизмат йўналишлари ва шахобчаларини ташкил этиш борасидаги илмий фаолияти Республика ва халқаро миқёсдаги анжуманларда ушбу соҳа олимлари томонидан юксак даражада эътироф этилди. Айниқса, Россия Таълим академиясининг академиги И.В.Дубровина, Россия руҳшунослик институтининг академиги В.В.Рубцов, Ўзбекистон республикаси Президенти девони маслаҳатчиси, таниқли олим, руҳшунослик фанлари доктори, профессор Г.Б. Шоумаров, Ўзбекистонда хизмат кўрсатган фан арбоби, руҳшунослик фанлари доктори, профессор М.Т.Давлетшинлар ёш олим томонидан олиб борилган илмий ишлар салоҳиятига катта баҳо бердилар. Ниҳоят, у 1998 йил 28 апрелда “Ўзбекистонда руҳий хизмат ташкил этилишининг ижтимой –психологик ва илмий –амалий асослари” мавзусидаги психология фанлар доктори илмий даражасини олиш учун ёзган диссертациясини муваффақиятли ҳимоя қилди.
Яқинда Олий Аттестация Комиссияси ижтимоий психология, этнопсихология мутахассислиги бўйича ихтисослашган Кенгаш қарорини тасдиқлади ва Ш.Р.Баротовга психология фанлари доктори деган юксак илмий унвонни берди.
Эндигина 39 баҳорни қаршилаган бу иқтидорли олим республикада руҳшунослик фани бўйича бор-йўғи саккизинчи фан доктори, вилоятимизда эса биринчи йирик олим сифатида эътироф этилибгина колмай, у бошлаган илмий соҳанинг ниҳоятда юксак салоҳияти, ижтимоий ҳаётимизда дорзарб ва заруриятини ҳам таъкидлаб ўтиш жоиздир.
Ҳозирги кунда университетимизнинг вақтинчалик илмий ишлари буйича проректори вазифасида фаолият кўрсатаётган Шариф Рамазонович Баротов яқиндагина Москвадаги ўтказилган рухшунослик олимларнинг халкаро миқиёсдаги анжуманидан қайтди. У жамоатчилик вазифаларини бажариш билан бирга шу даргоҳда психологик хизмат кўрсатиш йўналиши шахобчаларини тузиш бўйича амалий тадбирларни рўёбга чиқариш ўйлари билан яшамоқда. Бу юртбошимизнинг бозор иқтисодини ривожлантиришнинг янги беш Асосий тамойилларини амалги оширишда изланувчан, тиниб – тинчимас олимнинг муносиб ҳиссаси бўлиб қўшилади, деб умид қиламиз. Зеро, Шарифжоннинг бу саъй-ҳаракатлари унинг илм –фанга, шу заминга садоқати, эътиқодининг мевасидир. Бу чексиз эътиқод уни янги муваффақиятлар, улкан зафарларга етаклашига аминмиз.
* ушбу мақола “Интилганга толе ёр” рукни остида Бухоро давлат педагогика институтининг “Муаллим-педагог” (№ 40. ( 920). 1991 йил, 30 апрель) газетасида эълон қилинган.
Do'stlaringiz bilan baham: |