Бухоро давлат университети илм ва эзгулик бухоро – 2016

АҚЛИЙ ВА КАСБИЙ КОМИЛЛИККА ЭРИШГАН ИНСОН


Б.Н.Наврўз-Зода,
БухДУ профессори, иқтисод фанлари доктори, Турон ФА академиги, Англиянинг Кембридждаги Халқаро Биографик марказининг 2005 йилда иктисодиёт соҳасида “Халқаро Профессионал” номинацияси бўйича олтин медал совриндори

Дунёдаги барча нарса ўз қийматига эга. Уларнинг қийматини пулда ифодалаш мақсадида тегишли соҳа олим ва мутахассислари ҳар бир нарсанинг ўлчов бирлигини ишлаб чиққанлар. Масалан олтин нархи унция билан; бриллиант – карат; нефт – баррель; электро энергия – киловатт; ёғ – литр; газлама – метр ўлчов бирлиги билан ўлчанади ва баҳоланади.

Инсон ҳам бу фоний дунёга келиб камол топгани сари ўз қадр-қимматига эга бўлиб боради. Шунинг учун одамнинг қанча яшагани эмас, қандай яшагани муҳимдир. Мирзо Бедил қуйидаги рубоийси билан:
“Инсоннинг қиймати эмас сийму зар,
Инсоннинг қиймати илм ҳам ҳунар.
Забт этайин десанг сен илму ҳунар,
Инсон камолин эт ўзингга раҳбар”.
Айнан одамларнинг қадр-қимматини тўплаган моддий бойликлари билан эмас, балки ёнар чироққа ўхшаган ва унинг гавҳари бўлмиш илми ҳамда оқар булоқ каби амалда қўлланиладиган ҳунари билан ўлчашга ишора қилган. Ўзбек психология фанининг ёрқин юлдузи ва психологларнинг моҳир устози Шариф Рамазонович Баротов Бухоро давлат университетининг азиз ва нодир илмий-педагогик ходими ва ишбилармон раҳбари сирасига киради.
Мен Ш.Р.Баротовни 1993 йилдан Бухоро давлат университетига профессорлик лавозимига ишга келишимдан буён яхши биламан ва доимо мулоқотда бўлиб, ҳурмат қилиб келганман.
БухДУ да 23 йил биргаликдаги иш фаолиятимиз натижасида 55 ёшлигини нишонлаш арафасида шундай хулосага келдимки, бу киши нафақат жисмоний ва маънавий комил, балки ақлий ва касбий жиҳатлардан ҳам комилликка эришган инсондир. Чунки, Шариф Рамазонович доимо илмга интилувчан, интеллектуал қобилиятини ривожлантириш саъй-ҳаракатида бўлган, ақлу заковатли ва оқилу доно кишидир. У кишининг илмий асарлари на фақат мамлакатимизда, балки жаҳон миқёсида ҳам эътиборга молик бўлган илмий хазинадир. Ш.Р.Баротов илмий раҳбарлигида бир нечта фан номзоди тайёрланганки, бу олимнинг юқори илмий салоҳиятидан далолат беради.
Ш.Р.Баротов маҳоратли устоз ҳамдир. Кўп йиллар университетимизда психология фанидан дарс бериб, ёш психолог кадрларни тайёрлашда ўз ҳиссаларини қўшиб келмоқдалар.У кишининг ташаббуслари билан университетимизда психология таълим мутахассислиги бўйича мана қарийб ўн йилдан бери магистратура амал қилмоқдаки, унда устоз илғор педагогик ва ахборот-коммуникацион технологияларни қўллаб магистрантларга психологиядан юқори илмий-методик савияда сабоқ бериб,Ўзбекистон учун малакали психологларни тайёрлашда беминнат хизмат қилиб келмоқдалар.
Ш.Р.Баротов истеъдодли раҳбар сифатида университетда обрў-эътиборга сазовор бўлганлар. Кўп йиллар Психология кафедраси мудири сифатида уни маҳорат билан бошқариб келдилар.Бухоро вилояти Маънавият ва маърифат марказида раҳбар бўлиб ишлаганларида биз биргаликда вилоятимиз туманлари ва ташкилотларига бориб, жамоалар ўртасида давлатимизнинг иқтисодий сиёсатини ташвиқот ва тарғибот қилганмиз. Мана уч йилдирки, Бухоро давлат университетининг энг катта, мингдан ортиқ контингентли педагогика факультетини муваффақиятли бошқариб келмоқдалар.Ҳар бир берилган топшириқни оператив тарзда, омилкорлик билан бажариш кўникмасига эга ибратли раҳбар тоифасига кирадилар. Агар у кишига хос бўлган раҳбарлик услубини корпоратив бошқарув нуқтаи назаридан синчиклаб таҳлил қилсангиз, Шариф Рамазоновичга автократик ва либерал бошқариш услубларига нисбатан замонавий менежментнинг демократик услуби, яъни бошқарув қарорларни “етти ўлчаб бир кес” мақолига кўра ҳар томонлама ўйлаб, барча муқобил вариантларни кўриб чиқиб, мусбат ва манфий оқибатларини ҳамда тажрибали кишилар билан маслаҳатлашиб қабул қилишининг тизимлилиги хос бўлиб, ушбу услубни моҳирлик билан амалда қўллаган ҳолда бугун факультетни самарали бошқариб келмоқдалар.
Ш.Р.Баротов МДҲда нуфузли “Психология” илмий журналининг ташкилотчиси ва унинг Бош муҳаррири сифатида психология назарияси ва амалиётини ривожлантириш ва оммалаштириш ишида фаоллик кўрсатиб келмоқдалар. Мен иқтисодиётнинг индивид даражасидаги ўзига хос хусусиятларини ўрганадиган янги фан йўналиши бўлмиш наноиқтисодиётнинг “тўрт ўлчовли (жисмонан соғлом, маънавий етук, ақлу заковатли ва иқтисодий салоҳиятли) инсон қиёфаси”ни ҳамда “шахснинг иқтисодий комилликка эришиш йўллари”, “бадавлат кексалик индексини аниқлаш” каби илмий-амлий натижаларини қатор илмий мақолаларда айнан ушбу журналга чоп этиш ва уларни кенг оммага ташвиқот қилиш имкониятига эга бўлганман. Шариф ака билан бундай илмий ҳамкорлик қилишдан жуда ҳам мамнун бўлиб келганман. Биз 23 йилдан бери яқин дўстмиз. Бу кишининг қиёфасидан доимо нур сочиб туради.Жуда ҳам самимий инсон сирасига кирадилар.
Ҳурматли ва муҳтарам Баротов Шариф Рамазоновични иқтисодчилар номидан 55 ёшликлари билан чин қалбимиздан табриклаб сиҳат-саломатлик ва кейинги ҳаёт босқичларига омад тилаймиз. У кишига олтмишга кириб биологик жиҳатдан ёш кўринишда қолишни, етмишга ҳеч бир қийинчиликсиз етишини, саксондан енгилгина сакраб, тўқсон билан юмшоқгина тўқнашиб, юз ёшга кириб, бадавлат кексалик мартабасига эришиш учун зарур бўлган жисмоний, оилавий, демографик, руҳий, молиявий, турар жой, машғулот, тинч-осойишталикни тилаймиз. Пиру бадавлатлик даврида ҳам жаннатмакон ватанимиз равнақи йўлида хизмат қилиб юриш Сизга насиб қилсин.