Бухгалтерия ҳисоби ва аудит

Ишлаб чиқариш заҳиралари аудитинииг асосий вазифалари:

1. 
   Ишлаб чиқариш заҳиралари мавжудлигини ва сақланиш ҳолатини текшириш.
   
2. 
   Ишлаб чиқариш заҳиралари ҳаракатининг ҳужжатларда расмийлаштирилишини текшириш.
   
3. 
   Ишлаб чиқариш заҳиралари ҳисоб баҳосининг шаклланиши тўғрилигини текшириш.
   
4. 
   Ишлаб чиқариш заҳираларининг тўлиқлиги ва ўз вақтида киримга олинишини текшириш.
   
5. 
   Ишлаб чиқариш заҳираларининг ишлаб чиқариш ва бошқа мақсадларга сарфланишини текшириш.
   
6. 
   Тайёр маҳсулотлар ва жўнатилган товарларнинг тўғри баҳоланишини текшириш.
   
7. 
   Ишлаб чиқариш заҳираларининг ҳаракатини текшириш.
   

НАЗОРАТ САВОЛЛАРИ

1. 
   Материал қийматликларни текширишда қандай меъёрий ҳужжатлардан фойдаланилади?
   
2. 
   Тўғри баҳолаш қандай белгиланади:
   

• 
  материалларга;
  
• 
  товарларга;
  
• 
  инвентар ва хўжалик жиҳозларига?
  

3. 
   Инвентар ва хўжалик жиҳозларининг киримга олиниши ва ҳисобдан чиқарилишининг тўғрилигини текшириш қандай амалга оширилади?
   
4. 
   Инвентар ва хўжалик жиҳозларига эскириш ҳисобланадими?
   
5. 
   Материал ресурсларнинг мавжудлиги ва сақланиши тўғрилигини қандай текширилади?
   
6. 
   Ишлаб чиқариш заҳираларининг ҳаракати бўйича муомалаларнинг ҳужжатларда тўғри расмийлаштирилишини текшириш қандай амалга оширилади?
   
7. 
   Ишлаб чиқариш заҳираларидан келган камомад ва нобудгарчиликларнинг ҳисобдан чиқарилиши бўйича муомалаларнинг тўғри акс эттирилганлигини текшириш қандай амалга оширилади?
   
8. 
   Ишлаб чиқариш заҳираларининг аудитини текшириш манбалари бўлиб қайси дастлабки ҳужжатлар ва бухгалтерия счётлари ҳисобланади?
   
9. 
   Ишлаб чиқариш заҳираларининг инвентаризация натижалари қандай расмийлаштирилади ва унда кимлар иштирок этишлари лозим?
   

2-амалий машғулот.

1-масала. Шакар ишлаб чиқариш заводидан темир йўл орқали улгуржи савдо ташкилотига 25 тонна шакар жўнатилган. Юк ортилган вагон белгиланган станцияга 21.12.да келган ва юкларни туширишга берилган. Шакарни қабул қилиш пайтида 23.12 куни далолатнома расмийлаштирилиб, комиссия таркибига омбор мудири Низомов Т. ва Эгамов О., бухгалтер Қосимов Н.лар киритилган. Далолатномада кўрсатилишича мол етказиб берувчининг ҳужжатига мувофиқ 25000 кг шакар, ҳар бир килограмми 2000 сўм дан умумий суммаси 50000000 сўмни ташкил қилади. Шакарни тортиб кўрилганда 150 кг шакар суммаси 30000 сўм кам келганлиги кўрсатилган. Қабул қилиш далолатномасига асосан 24850 кг шакар бухгалтерияда киримга олинган. Камомад суммаси 2010 «Ишлаб чиқариш харажатлари» счётига ҳисобдан чиқарилган. Далолатнома ҳеч ким томонидан тасдиқланмаган. Шакарни ташиш пайтидаги табиий камайиши нормаси 0,15%.