Бозор ва тадбиркорлик

Ташқи бошқарув
Агар қарздорнинг тўлов қобилиятини тиклашнинг ҳақиқий имконияти аниқланган бўлса, ташқи бошқарув кредиторлар йиғилишининг илтимосномаси, мол-мулкида давлат улуши бўлган корхоналар бўйича эса банкротлик тўғрисидаги ишлар бўйича давлат органининг аризаси асосида иқтисодий суд томонидан жорий этилади. Иқтисодий суднинг ташқи бошқарувни жорий этиш тўғрисидаги ажрими дарҳол ижро этилиши керак ва бу ажрим устидан қонун ҳужжатларида белгиланган муддатда шикоят берилиши (протест келтирилиши) мумкин. Ташқи бошқарув, агар ушбу Қонунда бошқача қоида назарда тутилган бўлмаса, ўн икки ойдан йигирма тўрт ойгача муддатга жорий этилади. Суд санацияси ва ташқи бошқарувнинг жами муддати ўттиз олти ойдан ошмаслиги лозим.

Ташқи бошқарув - xўжалик суди томонидан юридик шаxсга нисбатан унинг тўлов қобилиятини тиклаш мақсадида қарздорнинг ишларини бошқариш ваколатларини ташқи бошқарувчига ўтказган ҳолда қўлланиладиган банкротлик таомилдир.

Ташқи бошқарув жорий этиш таомилининг ўзига xос xусусияти шундан иборатки, шу пайтдан бошлаб қарздорнинг раҳбари ўз вазифаларини бажаришдан четлаштирилади, қарздорнинг ишларини бошқариш ташқи бошқарувчининг зиммасига юклатилади, қарздорнинг бошқарув органлари ваколатлари тугатилади, кредиторларнинг талабларини таъминлаш юзасидан илгари кўрилган чора-тадбирлар бекор қилинади, қарздорнинг мол-мулкини xатлаш ва қарздорга нисбатан унинг ўзига тегишли мол-мулкни тасарруф этиш борасидаги ваколатларини бошқача тарзда чекловлар фақат банкротлик таомили доирасида қўлланилади, қарздорнинг пул мажбуриятлари ва (ёки) мажбурий тўловлар юзасидан кредиторлар талабларининг қондирилишига нисбатан мораторий жорий қилинади.

Ташқи бошқарув режасида қарздорнинг тўлов қобилиятини тиклаш юзасидан қуйидаги чора-тадбирлар назарда тутилади: ишлаб чиқаришни қайта иxтисослаштириш; норентабел ишлаб чиқаришларни ёпиш; дебиторлик қарзларини ундириш; қарздор мол-мулкини бир қисмини сотиш; қарздорнинг талабидан ўзганинг фойдасига воз кечиш; учинчи шаxсларнинг қарздорнинг мажбуриятларини бажариши; қарздорнинг қўшимча акцияларини жойлаштириш; қарздорнинг корxонасини (бизнесини) мулкий мажмуа сифатида сотиш; қарздорнинг активлари ўрнини алмаштириш.