Boqiysan, iftixorimsan,ona tilim!

ХИТОЙДА «ЎЗБЕК ТИЛИ» ДАРСЛИГИ ЯРАТИЛДИ

Мирзо Улуғбек номидаги Ўзбекистон Миллий университети ўқитувчиси Гулбаҳор Искандарова ҳамда Жонгянг Минцу университети ўқитувчиси Гулибонум Кейбатули томонидан 2016 йилда яратилган «Ўзбек тили» дарс­лиги қисқа вақт ичида хитойликлар орасида маш­ҳур бўлиб кетди.
— Бу каби китобларни тайёрлашда муаллифнинг ҳар икки тилни билиши жуда муҳим, — дейди Гулибонум Кейбатули. — Гулбаҳор Искандарова иккаламиз хитой тилини ҳам, ўзбек тилини ҳам яхши билганимиз учун ҳамма учун тушунарли, содда қўлланма яратишга интилдик. Мазкур китобнинг яна бир ўзига хос жиҳати шундаки, ундан ўзбек тилидан умуман, хабари йўқ хитойлик фойдаланганда ҳам бемалол ўзбек тилини ўрганиши мумкин.
Ўзбекистон — Хитой муносабатлари йилдан-йилга яхшиланиб бормоқда. Бугунги кунда икки давлатда ҳам тил ўрганиш масаласига жиддий эътибор қаратилмоқда. Ўзбекистонда хитой тилини ўрганиш истагида бўлган ёшлар сафи тобора ортмоқда. 2014 йил январь ойида Ўзбекистон Миллий университетининг ўзбек тилшунослиги кафедрасида (ҳозирда Тошкент давлат ўзбек тили ва адабиёти университети тасарруфида) мус­тақил изланувчи сифатида фаолият кўрсата бошлагандим. Ўтган вақт давомида ўзбек тилини янада чуқурроқ ўрганишга, бу борадаги билимларимни оширишга ҳаракат қилдим.
Мазкур китоб бизнинг кўп йиллик изланишларимиз самарасидир. Келажакда биз ушбу китобнинг иккинчи қисмини ҳам тайёрлаймиз. «Ўзбек тили» китоби ўзбек тилини ўрганиш истагида бўлган хитойликлар учун муҳим қўлланма бўлиб қолишига ишонаман.