Bolalar kiyimini tikish texnologiyasi

NAZORAT SAVOLLARI.
1.Yenglar konstruksiyasiga ko'ra qanday bo'ladi?
2.Yeng o'mizi cho'zilib ketmasligi uchun nima qilinadi?
3.O'tqazma yenglarni o'tqazishni qanday usullari bor?
4.Yeng boshidagi burmalar qanday hosil qilinadi?
5..Xishtak yengda qanday vazifani bajaradi?

14-Mavzu: YENG O'MIZINI TIKISHNI TAKOMILLASHTIRISH
Reja:

1. 
   Yengsiz kiyimlarning yeng o'miziga ishlov berish.
   
2. 
   Yeng o'mizini ag'darma chok bilan tikish.
   

Tayanch iboralar:
o'tqazma, reglan, kiyim old va ort bo'laklari, aralash bichilgan. chuqur o'yilgan, kvadrat.
Yengsiz kiyimlarning yeng o'miziga ishlov berish uchun mag'iz qo'yiladi va turli usulda tikiladi. Yeng o'miziga yalang qavat mag'iz qo'yib, mag'iz chok bilan tikishda (66- a rasm) yengning o'ng tomoniga mag'izning o'ngini qaratib qo'yib, 0,5-0,7 sm kenglikda ag'darma chok bilan tikiladi. Mag'izni chok atrofidan aylantirib, teskari tomonga o'tqaziladi va ziylari to'g'ri sirma qaviq bilan ko'klanadi. Mag'izning ochiq qirqimi maxsus mashinada yo'rmaladi. Ag'darma chokdan 0,1-0,2 sm oraliqda detaining o'ngi tomonidan bahyaqator yuritib puxtalanadi.
Ko'klangan iplarni so'kib tashlab, yeng o'mizi dazmollanadi.
Yeng o'mizining mag'izi ikki qavat bo'lsa (66- b rasm), mag'iz detalining teskari tomonini ichkariga qaratib, uzunasiga ikki buklab, dazmollanadi. Mag'izning ochiq qirqimini yeng o'mizi qirqimiga to'g'rilab qo'yiladi va 0,3-0,4 sm kenglikda ag'darma chok bilan tikiladi. Mag'izni chok atrofidan aylantirib teskari tomonga o'tkazib, 0,5-0,7 sm kenglikda bir tekis ramka hosil qilib, ziylari ko'klanadi. Ag'darma chokdan 0,1 sm oraliqda bahyaqator yuritib, mag'izning buklangan tomoni ilib, puxtalaniladi. Ko'klangan iplarni so'kib tashlab, yeng o'mizi dazmollanadi.
Yeng o'miziga mag'iz qo'yib, mag'iz chokini maxsus buklagich qo'llab tikishda (66- d rasm), mag'iz detalining ikkala qirqimini buklagich bilan buklab, orasiga asosiy detalni qo'yib, bitta bahyaqator bilan tikiladi.
Yeng o'mizi ag'darma chok bilan tikiladigan bo'lsa (66- e rasm), yengning o'ngi tomoniga mag'izni o'ngini qaytarib qo'yib, qirqimlari 0,7 sm kenglikda ag'darma chok bilan tikiladi. Chok haqi mag'iz tomoniga qaratib, ag'darma chokdan 0,1 sm oraliqda mag'izga bostirib tikiladi. Keyin mag'izni detal teskarisiga ag'darib, asosiy detaldan 0,1-0,3 sm kenglikda kant hosil qilib, ziylari ko'klanadi. Mag'izning ochiq qirqimini 0,7 sm teskariga bukib, bukilgan ziydan 0,1 -0,2 sm oraliqda buklab tikiladi va asosiy detalga qo'lda yashirin qaviqlar bilan puxtalab qo'yiladi. Qaviqlar orasi 3-4 sm bo'ladi. Ko'klangan iplarni so'kib tashlab, yeng o'mizi dazmollanadi.