Besh asrkim nazmiy saroyni, Titratadi zanjirband bir sher. Temur tig‘i yetmagan joyni Qalam bilan oldi Alisher

Tadbir tabrigi
Assalomu alaykum, hurmatli mehmonlar, tadbirimizning aziz ishtirokchilari! Mana bugun biz o‘zbek tilining asoschisi, g‘azal mulkining sultoni sanalmish hazrat Mir Alisher Navoiy bobomiz tavalludining 581 yilligini katta tantanalar bilan nishonlash uchun yig‘ilganmiz.
Alisher Navoiy 1441-yil 9-fevral kunida temuriylar sulolasi tasarrufidagi Xuroson davlati poytaxti sanalmish Hirot shahrida tavallud topganlar. Yoshligidan bilim olishga qiziqqan, o‘rtoqlari bilan turli xil o‘yinlar o‘ynash o‘rniga mashhur yozuvchilarning asarlarini o‘qib o‘rganishga harakat qilgan.
Hazrat Navoiy 60 yillik umri davomida turk tili va uning rivoji, dunyo tamaddunida turk tilining o‘z o‘rniga ega bo‘lishi uchun harakat qilgan. Asarlarida ushbu tilning sofligi, soddaligi, tushunarliligi, boyligi kabi sifatlarini ko‘rsatib berishga intilgan va buning uddasidan chiqqan.
U zot besh dostondan iborat bo‘lgan “Xamsa” asari va “Muhokamat ul-lug‘atayn” asarlari orqali turk tilining fors-tojik tilidan qanchalik ustun ekanligini, bu tilning faqatgina oddiy xalq tili bo‘lmasdan, balki mazmunli asarlar yaratishda ham ishlatilishi mumkin bo‘lgan tillardan biri ekanligini namoyon qilib bergan.
“Xamsa” asarini yozganda o‘sha davrning buyuk adibi, Navoiyning ustozi va do‘sti sanalmish Abdurahmon Jomiy shunday fikrlarni bildirganlar: Yaxshiyamki Navoiy o‘z asarini turk tilida yaratdi. Agar fors-tojik tilida yozganida edi, bizning asarlarimizni hech kim o‘qimagan bo‘lardi. Bu orqali u bizga marhamat ko‘rsatdi.
Ijodi orqali o‘ziga butun dunyo ilm-fanida haykal o‘rnatgan, turk tilining ijod ahli tili ekanligini ko‘rsatib bergan. O‘zbekiston Xalq Qahramoni, shoir Abdulla Oripovning quyidagi misralari Hazrat Navoiyning butun ijodiga berilgan baho, desak adashmagan bo‘lamiz:
Besh asrkim nazmiy saroyni,
Titratadi zanjirband bir sher.
Temur tig‘i yetmagan joyni
Qalam bilan oldi Alisher.
Yana bir bor barchangizni ushbu tantana – Hazrat Navoiyning tavallud kuni bilan tabriklayman. Yoshlarimizga bobomiz izidan borib, ularning ijodlarini yanada chuqurroq o‘rganib, o‘zbek va O‘zbekiston degan nomlarni butun dunyoga tanitishlariga tilakdoshman. E’tiborlaringiz uchun rahmat!