Baslawısh klass oqıtıwshıları ushın Nókis 2012

TÚSINDIRMELI DIKTANT 

Túsindirmeli  diktant  baslawısh  klasslardıń  hámmesi  ushın  sáykes  bolıp, 

oqıwshılarǵa jazdırılǵan tekst quramındaǵı jazılıwı qıyın sózlerdiń jazılıwın túsindiriw 

hám  mánisin  analizlew  maqsetinde  ótkeriledi.  Belgilengen  tekst  oqıwshılarǵa 

jazdırıladı.  Ondaǵı  sózlerdiń  jazılıwı  esletilmeydi.  Oqıwshılar  tekstti  jazıp  bolǵanınan 

keyin ondaǵı sózlerdi qalay jazǵanları tekseriledi. Álbette, oqıwshılar jazıwında ayırım 

qáteler bolıwı múmkin. Oqıwshılardıń jazıwındaǵı qáteleri tómendegi tártipte dúzetilip, 

túsindiriliwi múmkin: 

a) oqıwshılardan biri aytqan sózdegi qáteni basqa bir oqıwshı awızeki túsindiredi; 

b) oqıwshınıń qátesin oqıtıwshı awızeki túsindiredi; 

d) oqıwshı jazǵan qáte sózdi oqıtıwshı doskaǵa jazıp kórsetedi. 

Usı  tártipte  oqıwshılar  jol  qoyǵan  qátelerin  tabıp,  olardı  dúzetedi.  Bunıń  menen 

oqıwshılardıń jazıw sawatlılıǵın anıqlaw hám kemshiliklerin dúzetiw múmkin. 

Túsindirmeli diktant ushın tekstti oqıw sabaqlıqlarınan da tańlaw múmkin. Bunday 

jaǵdayda tekstti oqıwshılarǵa jazdırıp bolǵannan soń olar kitapların ashıp, jazǵanların 

salıstırıp  kóredi.  ózleri  sezgen  qátelerin  dúzetedi.  Biraq,  hámme  oqıwshılar  da  óz 

qátelerin  taba  almaydı.  Sonıń  ushın  olar  menen  óz  aldına  jumıs  alıp  barıwǵa  tuwra 

keledi. 

Bilimlendiriwshi  diktanttıń  basqa  túrleri  sıyaqlı  túsindirmeli  diktantı  da  jazıw 

sabaǵınıń  belgili  bir  bóliminde  ótkeriw  múmkin.  Túsindirmeli  diktant  oqıwshılardıń 

bilimin arttırıwǵa eń paydalı jazba jumıs túrlerinen biri esaplanadı. Bul diktant túrin 3-

4-klasslarda tez-tez ótkerip turıw maqsetke muwapıq.