Banklar va bank faoliyati to‘G‘risida

17-modda. Qimmatli qog‘ozlarni joylashtirish
Emitentlar qimmatli qog‘ozlarni mustaqil ravishda, shuningdek banklar va investitsiya vositachilari orqali joylashtirish huquqiga ega.
Qimmatli qog‘ozlarni joylashtirish quyidagi turlarda amalga oshirilishi mumkin:
qimmatli qog‘ozlarni xususiy joylashtirish (oldindan ma’lum bo‘lgan, soni cheklangan investorlar orasida ommaviy e’lon bermagan va reklama kampaniyasi o‘tkazmagan holda yopiq obuna qilish);
qimmatli qog‘ozlarni ommaviy joylashtirish (soni cheklanmagan investorlar orasida reklama kampaniyasini o‘tkazgan holda ochiq obuna qilish).
Oldingi tahrirga qarang.
Ushbu moddaning ikkinchi qismida sanab o‘tilgan hollarning har biri uchun qimmatli qog‘ozlar chiqarilishining eng kam yoki eng ko‘p hajmi qonunchilikda belgilanishi mumkin.
(17-moddaning uchinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
Aksiyalarning ochiq obunasi qimmatli qog‘ozlarning uyushgan savdosidagina o‘tkaziladi.
Banklar va investitsiya vositachilari emitentlar tomonidan chiqarilgan emissiyaviy qimmatli qog‘ozlar chiqarilishining joylashtirilmagan qismini sotib olish majburiyatini olib yoki olmagan holda emissiyaviy qimmatli qog‘ozlarni emitent nomidan sotish to‘g‘risida emitentlar bilan shartnomalar tuzishi mumkin.
Joylashtirilayotgan qimmatli qog‘ozlarning soni emissiyaviy qimmatli qog‘ozlarni chiqarish to‘g‘risidagi qarorda ko‘rsatilgan qimmatli qog‘ozlar sonidan ortiq bo‘lmasligi kerak.
Oldingi tahrirga qarang.
Emitent emissiyaviy qimmatli qog‘ozlarning haqiqatda joylashtirilgan sonini ularning chiqarilishi yakunlari to‘g‘risidagi bildirishnomada ko‘rsatadi. Emissiyaviy qimmatli qog‘ozlarning chiqarilishi yakunlari to‘g‘risidagi bildirishnomani taqdim etish tartibi qonunchilikda belgilanadi.
(17-moddaning yettinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
Emitent chiqarilayotgan emissiyaviy qimmatli qog‘ozlarni joylashtirishni ularni chiqarish to‘g‘risidagi qarorda nazarda tutilgan muddatda tugallashi shart, bu muddat qimmatli qog‘ozlarning chiqarilishi davlat ro‘yxatidan o‘tkazilgan kundan e’tiboran bir yildan oshmasligi kerak.
Emissiyaviy qimmatli qog‘ozlarni ommaviy joylashtirish emissiyaviy qimmatli qog‘ozlarning chiqarilishi davlat ro‘yxatidan o‘tkazilganligi to‘g‘risidagi axborot belgilangan tartibda oshkor qilinganidan keyin kamida ikki hafta o‘tgach amalga oshiriladi.
Emitent, shuningdek u bilan shartnomaga ko‘ra emissiyaviy qimmatli qog‘ozlar joylashtirilishini amalga oshiruvchi banklar va investitsiya vositachilari mazkur qimmatli qog‘ozlar olinguniga qadar investorga qimmatli qog‘ozlar emissiya risolasi va emissiyaviy qimmatli qog‘ozlarni joylashtirish shartlari bilan tanishib chiqish imkoniyatini ta’minlashi shart.
Hujjatsiz shakldagi emissiyaviy qimmatli qog‘ozlar ushbu qimmatli qog‘ozlar joylashtirilishi muddati ichida ularning haqi to‘liq to‘langanidan va ular oluvchilarning depo hisobvaraqlariga o‘tkazilganidan keyin joylashtirilgan hisoblanadi.