Bajardi: 201-guruh talabasi Bekchanova Dilnoza

Poytaxt Gurganj dunyodagi go'zal shaharlardan biriga aylandi. Tekesh olib borgan tashqi va ichki siyosatning kuchli tomonlari bilan birgalikda zaif tomonlari ham mavjud ediki, bu holat kelgusida bu davlatning ichidan yemirilishida o'ziga xos sabablaridan biri bo'ldi. U ham bo'lsa, Tekeshning qipchoq urug'idan bo'lgan xotini-Turkon xotunning o'z himoyasidagi qipchoq harbiy aslzodalariga hadeb homiylik qilishi edi. Bu ayol davlat ishlarini o'z qo'liga olishga urinar, qipchoqlarni davlatning ichki ishlariga aralashishiga imkoniyat yaratib berardi. Qipchoqlarning saroyda yirik imtiyozliligi asl xorazmlik turkiy a'yonlarga yoqmasdi. Bu holatlar esa ichki kurashlar, ziddiyatlarni yanada kuchayib borishiga ham sabab bo'lar edi.

Xorazmshohlar davlatida 1189 yildan 1200 yilgacha hukmronlik qilgan Oloviddin Tekesh faoliyatining asosiy yakuni davlat kuch-qudratining yanada kuchayganligidir. Tekesh, hukmdorlik bilan bog'liq hayotining deyarli barchasini harbiy yurishlarda o'tkazdi. Ulkan g'alabalarga erishdi, Xorazm davlatining uzoq o'lka va hududlarga tanitdi. 1200 yilning yozida Bag'dod xalifaligi tomon harbiy yurish uyushtirgan Oloviddin Tekesh yo'lda betob bo'lib, vafot etadi. 3 iyul kuni jasadi Gurganjga olib kelinib, o'zi qurdirgan madrasa oldida dafn etildi. Uning hukmronligi davrida qudratli davlat tuzilib, Xorazmning Osiyo va Yevropa mamlakatlari bilan aloqalari mustahkamlandi. Tekesh davrida bu davlat tarkibida aholi soni o'sib, ko'paydi. Hunarmandchilik, madaniyat, arxitektura yuksaldi.