Автомобиль саноати корхоналарида маркетинг стратегияларини такомиллаштириш

Муаммонинг ўрганилганлик даражаси. Маркетингнинг назарий асослари ва маркетинг стратегияси Г.Азоев, О.Беленов, Е.Голубков, Дж.О.Шонесси, Д.Ямпольской, К.Девид, А.А.Бравермана, С.Минетт, Н.Молчанов, О.Уолкер, Х.Бойд, Ж.Ларше, Дж.Маллинс, В.Салий, И.Сольская, Р.Фатхуддинов, Г.Хардинг, В.Шкардун каби таниқли хорижий олимлар томонидан тадқиқ этилган⁶.
Иқтисодиётни модернизациялаш шароитида республикамиз саноат корхоналарида маркетинг стратегиясини шакллантириш масалалари А.Бекмуродов, Г.Ахунова, М.Болтабоев, Ж.Жалолов, И.Иватов, Д.Мухиддинов, А.Солиев, А.Фаттахов, М.Юсупов, М.Қосимова, Ш.Эргашходжаева⁷ ва бошқаларнинг илмий изланишларида ўз аксини топган.
Мамлакатимиз иқтисодчи олимларидан М.Қосимова хизматлар бозори маркетингини тадқиқ этган бўлса, М.Болтабаев, А.Солиев, А.Фаттоҳов, Ш.Эргашходжаевалар томонидан маркетинг стратегиясини ишлаб чиқиш ва такомиллаштириш масалалари илмий асосда ўрганилган. Таъкидлаш лозимки, республикамиз олимлари томонидан халқаро рақобат ва миллий ишлаб чиқаришни модернизациялаш шароитида автомобиль саноати корхоналарида маркетинг стратегиясининг назарий ва услубий асосларини такомиллаштириш махсус, мустақил илмий тадқиқот объекти сифатида ўрганилмаган. Айнан шу жиҳатлар диссертация мавзусини танлаш ва тадқиқот вазифалари доирасини белгилашга асос бўлди.
Диссертация мавзусининг диссертация бажарилган олий таълим муассасасининг илмий тадқиқот ишлари режалари билан боғлиқлиги. Диссертация тадқиқоти Тошкент давлат иқтисодиёт университети
Ф1-161. «Халқаро стандартларни жорий қилиш орқали қишлоқ хўжалиги маҳсулотлари рақобатбардошлигини ошириш услубиётини такомиллаштириш» мазусидаги фундаментал (2017-2019 йй.) ҳамда AU-1-32. «Миллий брендларни шакллантириш асосида мамлакат экспорт салоҳиятини ошириш» мавзусидаги амалий (2015-2017 йй.) лойиҳа доирасида бажарилган.
Тадқиқотнинг мақсади автомобиль саноати корхоналарида маркетинг стратегияларини такомиллаштириш ва cамарадорлигини ошириш юзасидан илмий асосланган таклиф ва амалий тавсиялар ишлаб чиқишдан иборат.