Assalamu alaykum va rohmatullohi va barokatuhu!

Hisobot

Hisobot — korxonalar, tashkilotlar, kompaniyalar tomonidan oʻz faoliyati toʻgʻrisida davriy (oy, chorak, yil) va belgilangan shaklda tuziladigan, davlat, statistika va moliya organlariga taqdim etiladigan axborot, maʼlumotlar, hisob-kitob hujjatlari elektron shaklda taqdim etiladi. Balans hisobot, moliyaviy hisobot va statistik hisobot, xoʻjalik yurituvchi subyektlar faoliyatida muhim ahamiyatga ega. Balans hisoboti — kompaniya buxgalteriya hisobotining asosiy shakli boʻlib, muayyan sana uchun kapitalni shakllantirish manbalari va kapital qoʻyilmalar yoʻnalishini tavsiflaydi.

Ikki tomonlama jadval shaklida tuziladi; uning chap qismi (aktiv)da kapital tarkibi va uning joylashtirilishi toʻgʻrisida maʼlumotlar, oʻng qismi (passiv)da kapi-tal manbalari koʻrsatiladi. Aktivda asosiy va aylanma kapital koʻrsatkichlari, passivda oʻziniki boʻlgan va jalb etilgan kapital tuzilmasi va miqdorlari beriladi.

Juda batafsil tuziladigan ichki balans kompaniya boshqaruvi tomonidan kompaniya faoliyatini rejalashtirish va boshqarishda, filiallar ishini nazorat qilishda foydalaniladi. Tashqi balans tashqi hisobotning boshqa shakllari bilan birga kompaniya faoliyati toʻgʻrisida toʻliq va ochiq axborot hisoblanadi. Davlat soliq va yuqori rahbarlik organlariga, fond birjalariga taqdim etiladi, aksiyadorlar oʻrtasida tarqatiladi, maxsus maʼlumotnomalarda eʼlon qilinadi. Tijorat-savdo sirini saqlash maqsadlarida kompaniyalar balansida rasman ruxsat etilgan modda (band)larni guruhlash va umumlashtirishdan keng foydalaniladi (qisqa balans).

Kompaniyalarning moliyaviy hisoboti - hisobot topshirishning majburiy shakli. Unga quyidagilar kiradi: kompaniyaning umumiy balansi; foyda va koʻrilgan zarar toʻgʻrisida hisobot; pul mablagʻlari harakati toʻgʻrisida hisobot va kompaniya rahbariyatining umumiy majlisda koʻrib chiqish va tasdiqlash uchun kompaniya investitsiyachilari yoki aksiyadorlari eʼtiboriga havola etiladigan yillik ma’lumotlari.