Asbob-uskuna tanlash uchun hisoblash shartlari

Yong'in xavfsizligiga oid tushunchalar
Yonish — yonuvchi moddaning havo kislorodi yoki boshqa oksidlovchi modda bilan oksidlanishining tez kechadigan kimyoviy reaksiyasi bo'lib, bunda yorug'lik va issiqlik ajraladi. Yoqilg'ining ko'p qismini tashkil etadigan uglerod to'la yonganda karbonat angidrid hosil bo'ladi. Agar kislorod yetarli bo'lmasa, karbonat angidriddan tashqari, yana yonishi mumkin bo'lgan uglerod (Il)-oksid ham hosil bo'ladi. Yonish mumkin bo'lishi uchun yonish tezligi ajralib chiqayotgan issiqlik miqdorining atrofga tarqalayotgan issiqlik miqdoridan ortiq bo'lishini ta'minlashi va yonish doirasida harorat yonuvchi moddaning hamma yangi qismlarining o't olishi uchun yetarli bo'lishi kerak. Yonuvchi suyuqlik alangalanishi uchun uning harorati shunday bo'lishi kerakki, sirtidagi havoda yonuvchi suyuqlik bug'ining konsentratsiyasi yetarli darajada bolsin. Yog'och yoki toshko'mir dastlab qizish natijasida parchalanib yonuvchi gazlar hosil qiladi.
Alangalanish — mahalliy qizish natijasida yonuvchi moddaning (uning bug' va gazlarining) turg'un yonishi. Alangalanishga yonuvchi moddaning alanga yoki cho'g'langan jismga tegishi sabab bo'lishi mumkin. Qisqa muddatli chaqnash bo'lmasdan yonuvchi modda alangalanishi mumkin.
Portlash — moddaning bir holatdan ikkinchi holatga juda tez o'tishi (portlab yonishi) bo'lib, bunda ko'p miqdorda energiya chiqadi va ko'p miqdorda siqilgan gazlar hosil bo'ladi, bu siqilgan gazlar yemirilishga olib kelishi mumkin. Portlashda hosil bo'ladigan yonuvchi gazsimon mahsulotlar havoga tegib, ko'pincha alangalanishi va buning oqibatida yong'in chiqishi mumkin.
O'z-o'zidan alangalanish modda ma'lum haroratgacha qizdirilganda unga bevosita alanga tegmasdan turib sodir bo'ladi. O'z-o'zidan alangalanish harorati moddaning yong'in jihatidan xavfli xossalarini belgilovchi muhim parametrdir. Yog'ochning o'z-o'zidan alangalanish harorati 270° ga teng. Qattiq moddalarning o'z-o'zidan yonishi, yonuvchi moddaning o'zida kechadigan fizikaviy, kimyoviy biologik jarayonlar ta'sirida va moddaning qizishi natijasida yuz beradi.