Anorgul atajonova

OLMOSH 
 
113-mashq.  Matnni  o‘qing,  olmosh  so‘z  turkumini  topib 
daftaringizga  yozing.  Matn  mazmunini  ayting.  "Ovqatlanish  odobi" 
mavzuida o‘zaro suhbat uyushtiring.  
 
Dasturxonda  tansiq  taom  bo‘lsa-yu,  oz  bo‘lsa,  unga  hirs  bilan 
tashlanmaslik  kerak.  Aksincha,  iltifot  yuzisidan  uni  boshqalarga  havola 
qilmoq  lozim.  Ovqat  yeyilayotgan  paytda  har  kim  o‘z  sherigining 
yeyayotgan luqmasiga qaramasligi, o‘z oldidan olmog‘i, biroq meva-cheva 
bo‘lsa, boshqa joydan ham tanlab olmog‘i mumkin.  
Og‘ziga solingan ovqatdan suyak yoki biror nomunosib narsa chiqsa, 
og‘zidan  olib dasturxonga qo‘ymasin. Masalan, og‘zida  suyak bo‘lsa, uni 
o‘zgalarning  diqqatini  jalb  qilmasdan,  bekitib  olsin.  O‘zgalar  ishtahasini 
buzadigan  va  iffatini  ketkizadigan  harakatdan  nihoyatda  ehtiyot  bo‘lsin. 
Og‘zidan qaytarib olingan narsani qaytarib idishga solmasin. Shunday yo‘l 
tutsinki,  undan  qolgan  ovqatdan  tabarruk  sifatida  ichuvchi  o‘zga 
kishilarning nafratini qo‘zg‘otmasin.  
Kishi  mehmon  bo‘lsa,  qo‘lini  mezbondan  oldin  artishga  harakat 
qilsin.  Ko‘pchilik  qo‘l  tortsa,  u  ko‘pchilikka  ergashsin.  Och  bo‘lsa  ham 
uning  ahamiyati  yo‘q.  Bordi-yu,  mezbon  bo‘lsa  o‘zgalar  qo‘l  tortganda 
ham  u  qo‘l  tortishdan  tiyilib  tursin.  To  ki  mehmonlarning  birortasida 
yeyishni davom ettirish xohishi bo‘lsa uyalib qolmasin.  
Ovqat  orasida  suv  ichish  istagi  paydo  bo‘lsa,  suvni  ohistalik  bilan 
ichsin.  Toki  ichayotganda  kishilar  uning  og‘zi  va  xalqumi  ovozini 
eshitmasin.  Odamlar  ovqat  yeyayotganda  tishini  kovlamasin.  Tishdan 
chiqqan  narsani  shunday  joyga  tashlasinki,  toki  odamlarning  nafratini 
qo‘zg‘otmasin. Qo‘l yuvayotganda qo‘lni va tish ostini tozalashga alohida 
diqqat qilsin ("Xulosat al-hukamo" dan).