Андижон давлат университети ҳузуридаги илмий даражалар берувчи dsc 03

Тадқиқотнинг предмети сифатида 1945-1991 йилларда Жанубий Ўзбекистон вилоятларининг ижтимоий-иқтисодий ва маданий ҳаётида юз берган ўзгаришлар жараёнлари белгиланган.
Тадқиқотнинг усуллари. Диссертацияда тарихийлик, тизимлаштириш, қиёсий таҳлил, муаммовий-хронологик ҳамда фанлараро ёндошув каби илмий тадқиқот усулларидан фойдаланилган.
Тадқиқотнинг илмий янгилиги қуйидагилардан иборат:
Марказнинг Ўзбекистонга хом ашё манбаси сифатида қараш сиёсати туфайли республика иқтисодиётининг ягона халқ хўжалиги тизимига киритилиши ҳудуддаги ижтимоий дастурларни ривожлантиришга жиддий тўсиқ бўлиб, бундай шароитда аҳолини иш билан таъминлаш, одамларга муносиб турмуш шароитини яратиш ҳамда аҳоли фаровонлигини йўлга қўйиш оғир кечганлиги исботланган;
Ўзбекистоннинг жанубий вилоятларида кўп тармоқли саноат ишлаб чиқариш базасининг шаклланмаганлиги халқ хўжалигини бир томонлама ривожланишига олиб келиб, ушбу тенденция мазкур ҳудудда саноатнинг ишлаб чиқариш соҳалари ва қишлоқ ҳўжалигининг саноатлашиши паст даражада қолишига асос бўлганлиги далилланган;
Сурхон-Шеробод ва Қарши чўллари ўзлаштирилиб, янги ерларни қишлоқ хўжалик оборотига киритилиши соҳада пахта яккаҳокимлигини йил сайин ошиб бориши баробарида бошқа хўжалик экин майдонларининг камайиши, шунингдек, боғдорчилик, полиз ва сабзавотчиликда асрлар давомида шаклланиб келган тажрибанинг унутилишига олиб келганлиги исботланган;
жанубий вилоятлардаги шаҳар аҳолисининг ижтимоий ҳаётида ижобий ўзгаришлар юз беришига қарамай, ишсизлик, уй-жой тақчиллиги, реал даромаднинг пастлиги озиқ-овқат ва кенг истеъмол молларининг таъминотидаги узилишларга сабаб бўлиб, бу ҳолат ишчи ва хизматчиларнинг меҳнат натижаларидан манфаатдорлик ҳиссининг камайиши ҳамда ўткир ижтимоий муаммоларни келиб чиқишига замин яратганлиги асосланган;
минтақа маданий ҳаётида, аввало, маданият муассасаларининг моддий-техник таъминоти мустаҳкамланиб, иккинчи томондан эса соҳада фаолият юритаётган мутахассислар тоифасининг кўпайиб бориши пировардида маданият муассасаларининг сонини ўсиши ҳамда аҳолига кўрсатилаётган маданий хизматларнинг тури ва сифати яхшиланишига олиб келганлиги исботланган.