Andijon davlat universiteti axborot texnologiyalari kafedrasi

Ta’lim berish etikasi

Ta’lim berish etikasiga rioya qilish o’qituvchining talabalar ko’z o’ngidagi obro‘-e’tiborini kuchaytirib, darsning ahamiyatini ham ancha oshiradi. O’qituvchining dars davomida hamda jamoa orasida o’zini tutishi, gapirish va muomala madaniyati, kiyinishi, nutq mazmuni, muhim bilimlarni bera olish qobiliyati, savollarga javob berishi, dunyoqarashining kengligi shak-shubhasiz uning reytingini (imidjini, obro’sini) oshirishga olib keladi. Ta’lim berish etikasini rivojlantirish va uni har bir bosqichda tekshiruvdan o’tkazish uchun amalda quyidagi uch vositani qo’llash mumkin:

• 
  tasdiqlov,
  
• 
  dialog (muloqot),
  
• 
  o’zaro, hamkor (kooperativ) muloqot.
  

Har bir talabaning bergan savollarini diqqat bilan tinglash, ijobiy fikrlarini tasdiqlash, ularning intilishlarini, qiziqishlarini hamda qobiliyatlarini hisobga olgan holda tegishli javob berish talabalar ko’z o’ngida o’qituvchining hurmatini yanada oshiradi (ko’taradi) va ular bu o’qituvchi bilan bog’liq ushbu fanga yana ham qiziqa boshlaydilar. Chunki ko’pincha fan va uni o’qitadigan o’qituvchi haqida talabalar ko’z o’ngida birday tasavvur hosil bo’ladi. Ko’pincha insonlar Sizning nimani gapirayotganingizga emas, balki qanday gapirayotganingizga ko’proq e’tibor beradilar va shu asnoda aytmoqchi bo’lgan fikringizni qabul qiladilar. Agar Siz ularning o’qituvchilar haqidagi ichki fikrini, dunyoqarashini va tasavvurini tasdiqlasangiz hamda ularning tasavvuridagi «Yаxshi» va «Ijobiy» o’qituvchi bo’la olsangiz, ular ham Sizning faningizni qiziqish bilan va yaxshi o’zlashtiradilar.