Amaliy mashg’ulot №4 mavzu: xavfsizlik texnikasi bo‘yicha yo‘riqnomalar va ularni hujjatlashtirish tartiblari

Ish joyidagi birlamchi yo‘riqnoma. Ishga yangi qabul kilingan ishchi kirish yo‘riqnomasidan o‘tgach maxsus kiyim bosh hamda shaxsiy himoya vositalari bilan ta’minlanadi va ish joyiga boradi. U yerda unga bo‘lim (brigada yoki tsex) boshlig‘i xavfsizlik texnikasi bo‘yicha ish joyidagi birlamchi yo‘riqnomani o‘tkazadi.
Ish joyidagi birlamchi yo‘riqnoma tashkilot rahbari yoki bosh muhandis hamda kasaba uyushmasi qo‘mitasi tomonidan tasdiqlangan qo‘llanmalar asosida o‘tkaziladi va maxsus jurnalga qayd etiladi.
Birlamchi yo‘riqnoma o‘tkazish jarayonida ishchini asosan quyidagilar bilan tanishtirish lozim bo‘ladi:
– ushbu ish joyidagi texnologik jarayonlar va tashkiliy-texnik qoidalar;
– ish joyini tashkil etish bo‘yicha talablar;
– mashina yoki agregatning tuzilishi, ishlashi va xavfli joylari;
– ushbu ish turi bo‘yicha xavfsizlik texnikasi;
– mashina yoki agregatda ishlashning xavfsiz usullari;
– texnologik jihozlar bilan ishlash qoidalari;
– elektr jihozlari va ular bilan ishlash qoidalari;
– ish joyining yoki ish maydonining xavfli zonalari;
– ish joyining yoki ish maydonining «signalizatsiya»si va undan foydalanish tartiblari.
Yuqorida qayd etilgan masalalardan tashqari ish joyidagi yo‘riqnoma ish joyining, ishning va ishchining malakasiga bog‘liq holda boshqa tadbirlar bilan to‘ldirilishi mumkin.
Reja bo‘yicha yo‘riqnoma ishning xarakteri va xavflilik darajasiga qarab ish joyidagi birlamchi yo‘riqnomadan 3 yoki 6 oy keyin o‘tkaziladi. Ushbu yo‘riqnoma ishchilarni mehnat muhofazasi bo‘yicha bilimlarini oshirish va tekshirish maqsadida ish joyidagi birlamchi yo‘riqnoma dasturi asosida ish joyida brigada, bo‘lim, sex boshlig‘i tomonidan o‘tkaziladi va yo‘riqnoma o‘tkazgan xodimning hamda ishchining imzosi bilan jurnalga qayd etiladi.
Rejadan tashqari yo‘riqnoma. Bu yo‘riqnoma ishlab chiqarish texnologiyasi yoki texnikasi o‘zgarganda, ishchi bir ishdan boshqa ishga o‘tkazilganda, xavfsizlik texnikasi qoidalari buzilganda va baxtsiz hodisa ro‘y byerganda, shuningdek, ishda 60 kundan ortiq tanaffus bo‘lgan holatlarda (yuqori mehnat xavfsizlik talablari qo‘yiladigan ishlar uchun 30 kun) o‘tkaziladi.