Allayarov A. I. O’rmonov H. B. O‘zbekistondagi ziyoratgoh obidalar

Hazrati Eshon xalifa ziyoratgohi. Ushbu tabarruk maskan Forish tumanining chekka tog‘li hududidagi Andagin qishlog‘ida joylashgan. Qadamjo Jizzax shahridan 120 km., tuman markazi — Bog‘don shaharchasidan 45 km. shimoli-g‘arbdagi uzoqlikdadir. Ziyoratgoh 2015 yilda madaniy meros ob’yekti sifatida muhofazaga olinib, davlat ro‘yxatiga kiritilgan.

Andagin nomining etimologiyasi haqida bir necha talqinlar mavjud. Shulardan biri, akademik A.Muhammadjonovga taaluqli, unga asosan qadimiy so‘g‘d tiliga xos bo‘lgan, Andagin so‘zi andi — «yaqin», gin — «suv», ya’ni suv yaqin ma’nosini beradi. Olim Andagin, Andigon, Andijon kabi toponimlarni hamma’no ekanligini ta’kidlaydi. Ushbu hududida olib borilgan arxeologik tadqiqotlardan ma’lum bo‘lishicha, qishloqda taxminan IV-V asrlarda qurilgan, atrofi devor bilan o‘ralgan va mahalliy xalqni xavf-xatardan saqlash uchun xizmat qilgan, qadimiy istehkomli qal’a va qo‘rg‘on mavjud bo‘lgan.