Alimoff team books

 
ЎЛИМ ЮЛДУЗИНИНГ ФИЗИКАСИ 
Юлдузлар жангида бўлгани каби бутун оламни йўқ қила оладиган қуроллар 
яратилиши мумкинми? Назарий жиҳатдан, ҳа. Бунинг бир неча йўллари мавжуд.
Водород бомбаси портлаши натижасида чиқадиган энергиянинг физик 
чегараси йўқ. Мана, у қандай ишлайди. (Ҳатто бугунги кунда водород бомбаси 
ҳақидаги батафсил маълумотлар АҚШ ҳукуматининг энг юқори даражадаги 
махфий ахборотлари ҳисобланади, аммо умуман олиб қараганда, унинг тузилиши 
деярли маълум.) Водород бомбасининг тайёрланиши бир неча босқични ўз ичига 
олади. Зарурий босқичларни мос равишда кетма-кет бирлаштириб, маълум бир 
кучга эга бўлган ҳар қандай ядровий бомба яратиш мумкин.
Биринчи босқич – бўлиниш реакциясидаги стандарт бомба ёки атом бомба. 
Бунда уран-235 энергияси, худди Хиросимада содир бўлгани каби, рентген 
нурларини келтириб чиқариш учун ишлатилади. Атом бомбаси парчаланишидан 
бир неча сония ўтгач, кучли рентген тўлқин доираси пайдо бўлади. Мазкур 
нурланиш ёруғлик тезлигида содир бўлгани учун портлашнинг ўзидан кўра 
тезроқ суръатга эга. Унинг нурлари қайтадан бир нуқтага тўпланади ва водород 
бомбасининг фаол моддаси бўлган литий дейтеридли идишга йўналтирилади. (Бу 
жараён қандай амалга оширилиши ҳали-ҳануз давлат сиридир.) Рентген нурлари 
дейтерид литийга тушади ва унинг дарҳол қисқаришига ҳамда миллион 
даражагача исишига олиб келади. Иккинчи портлаш биринчисига қараганда анча 
кучли эффектни келтириб чиқаради. Яъни кейинги портлаш натижасида вужудга 
келган рентген нурланиш литий дейтериднинг иккинчи қисмига йўналтирилиши 
асносида учинчи портлашни келтириб чиқариши мумкин. Литий дейтеридли 

---

кўплаб контейнерларни ёнма-ён жойлаштириш орқали ақл бовар қилмас кучга эга 
бўлган водород бомбасини яратиш мумкин. Шундай қилиб, инсоният тарихидаги 
энг кучли бомба 1961 йилда Совет Иттифоқи томонидан портлатилган икки 
босқичли водород бомба эди. Назарий жиҳатдан бу бомба 100 мегатондан ортиқ 
ТНТ (тринитротолуол) ишлаб чиқаришга қодир бўлган эса-да, ўшанда 50 
миллион тонна ТНТ қувватига эга портлаш юз берди (бу Хиросимага тушган 
бомбадан тахминан 5,000 марта кучлироқ эди). 
Бироқ бутун сайёрани эритиш учун бутунлай бошқа қувват керак. Бунинг 
учун ўлим юлдузини космосга отадиган бу каби минглаб рентген лазерини бир 
вақтнинг ўзида ишга тушириш керак эди. (Таққослаш учун айтиш лозимки, совуқ 
уруш даврида Aмерика Қўшма Штатлари ва Совет Иттифоқи 30,000 атрофида 
ядровий бомба тўплаган.) Бунда кўплаб рентген лазерларининг бирлашган 
энергияси сайёра юзасини эритиб юбориш учун етарли эди. Англашиладики, 
биздан юз минг йиллар кейинги келажак галактик империяси, албатта, бундай 
қуролларни яратиши мумкин.
Юқори даражада ривожланган цивилизация учун яна бир йўл бор: гамма-
нурли портлашларнинг космик манба энергиясидан фойдаланувчи ўлим 
юлдузини яратиш. Бундай ўлим юлдузидан фақатгина Катта портлашдан кейинги 
иккинчи даражали нурланишни юзага келтирадиган чақнаш содир бўлади. Гамма-
нурли портлаш манбалари табиий ҳодиса бўлиб, улар фазода мавжуддир; шунга 
қарамай, бир кун келиб ривожланган цивилизация уларнинг улкан энергиясини 
жиловлаши мумкин. Агар биз юлдуз айланишини гипернованинг (жуда катта 
ёруғлик ва энергия ишлаб чиқарадиган портловчи юлдуз) туғилишидан анча 
олдин назорат қила олсак, гамма-нурли портлашлар манбаи “зарба”сини 
фазонинг исталган нуқтасига йўналтиришимиз мумкин.