Aholini ro‘yxatga olish. Ma’lumotlar farovonlikni oshirishga yo‘naltiriladi

AHOLINI RO‘YXATGA OLISH.
MA’LUMOTLAR FAROVONLIKNI OSHIRISHGA YO‘NALTIRILADI
Ma’lumki, hozirgi kunda mamlakatimizning turli korxona va tashkilotlarida, ta’lim muassasalarida aholini ro‘yxatga olish tadbirining targ‘ibot-tashviqot ishlari olib borilmoqda. Mazkur jarayon O‘zbekistonda 2023 yilning oktyabr-noyabr oylarida o‘tkazilishi belgilangan. Aholini ro‘yxatga olish tadbirlari maxsus tayyorlangan so‘rovnoma asosida respondentlardan javob olish tarzida planshet orqali o‘tkaziladi. Savollarning asosiy mazmun-mohiyati doimiy aholi soni, ijtimoiy-demografik xususiyatlari (yoshi, jinsi), aholining yashash sharoitlari, migrastiya, aholining nikoh holati, fuqaroligi, ta’lim darajasi, tillarni bilishi, daromad manbalari, bandlik va shunga o‘xshash ma’lumotlardan iborat.
Aholini ro‘yxatga olishning shaxsga doir ma’lumotlari “Aholini ro‘yxatga olish to‘g‘risida”gi O‘zbekiston Respublikasi Qonunining 10-moddasiga muvofiq maxfiy bo‘lib, respondentning roziligisiz oshkor etilmaydi va tarqatilmaydi. Respondentlardan yig‘ilgan ma’lumotlar faqat yakuniy ma’lumotlarni shakllantirish uchun ishlatiladi.
Jumladan, aholini ro‘yxatga olish natijalari demografik prognozlarni shakllantirish, respublika va hududlarni ijtimoiy-iqtisodiy rivojlantirish, yangi ish o‘rinlarini yaratish, oilalarga yordam ko‘rsatish, uy-joy bilan ta’minlash kabi davlat dasturlarini manzilli ishlab chiqishda muhim axborot manbai bo‘lib xizmat qiladi. Shuningdek, aholini ro‘yxatga olish natijalaridan oliy ta’lim muassasalarining iqtidorli talabalari, magistrantlari hamda tayanch doktorant va mustaqil izlanuvchilari ilmiy-tadqiqot ishlarida ham foydalanishlari mumkin.



BuxDU PI
Tabiiy fanlar kafedrasi mudiri,
geografiya fanlari nomzodi A.M.Mavlonov