Қадрига етинг бўлса акангиз

ҚАДРИГА ЕТИНГ

Қадрига етинг бўлса акангиз,

Қўлидан етакланг бўлса укангиз.
Кун келиб мабодо кучдан қолсангиз,
Бегоналар сари чопа олмайсиз,
Улардан бошқани топа олмайсиз.

Бошга кўтаринг бўлса синглингиз,

Шу қизча кўтарар бир кун кўнглингиз,
Мудом интизордир пойлаб йўлингиз.
Косада луқма ошни юта олмайсиз,
Улардан бошқани топа олмайсиз.

Агар ёнингизда бўлса опангиз,

Эмаклаб борингда пойин ўпингиз.
Яккаю-ягона дуогуйингиз,
Бозордан бошқа бир опа олмайсиз,
Улардан бошқани топа олмайсиз.

Яхши кунда қадрин билинг ёрингиз,

Ўшадир номус, ўша орингиз
Тарқалиб кетганда йўғу борингиз.
Кўз ёшни ўзгага сепа олмайсиз,
Ундан бошқасини топа олмайсиз.

Бугун шўх югурган жажжи болангиз.

Артади кун келиб кўзда жолангиз.
Суйкалиб келса гар бошин силангиз.
Ўзгани боласин ўпа олмайсиз.
Улардан бошқасин топа олмайсиз.

Оҳ қадрига етинг бўлса Онангиз.

Дуосини олинг бўлса Отангиз
Тузатинг шу бугун бўлса хатоингиз.
Аттанг эшигини ёпа олмайсиз.
Улардан бошқасин топа олмайсиз.