Адҳам ваисов

Сўзак – Гонорея (Gonorrhoea)


Сўзак – жинсий йўл билан юқувчи касаллик бўлиб, бир қатор ци­лин­дрик эпителий ҳужайралари билан қопланган шиллиқ пардаси­нинг носпецифик яллиғланиши.
Клиник кўриниши. Касаллик уретрадан суюқ йирингли ажратма ажралиши ва уретрада нохуш ҳиссиёт билан бошланади, сийиш вақтида ва сийгандан сўнг, беморни оғриқ ва ачишиш безовта этади. Кўздан кечирганда, бемор уретрасининг ташқи тешиги гиперемия­ланган, шишган ва кенгайган бўлиб, суюқ йирингли ажратма кўриниб туради. Икки стаканли (Томпсон синамаси) синама ўтказилганда, сийдикнинг биринчи порцияси – лойқа, иккинчи порцияси эса тиниқ бўлади. Уретра пальпациясида унинг шишганлиги сезилади.
Гонорея кўпинча простата бези яллиғланишининг сабабчисидир. Субъектив ҳиссиётлар яллиғланиш жараёнининг фаоллиги ва тарқоқлигига боғлиқдир. Беморлар сийдик ажралиши ва жинсий ҳаёт­нинг ўзгариши ва дефекациянинг оғриқли бўлишига шикоят этадилар. Прос­тата безини пайпаслаш, секин-аста текшириш простатит (pros­ta­titis) турини аниқлашга имкон беради. Шу хил шикоятлар уруғ пуфак­ча­ларининг яллиғланганида (vesiculitis) ҳам кузатилади. Везикулит­нинг клиник турларини аниқлаш учун уруғ пуфакчалари пальпатор текширилиб, унинг суюқлиги лаборатор текширилади.

Аёллар гонореяси

Клиник кўриниши. Касаллик бошланганини кўпчилик аёллар сезмайдилар, сабаби шикоят йўқ ёки кам безовталанадилар. Дастлабки белгиси – йирингли ажралма ажралиши. Айрим ҳолларда оғриқли, тез-тез сийишга мойиллик кузатилади, бу ҳиссиётлар деярли ҳамма ҳомиладор аёлларда, климактерик ёшдагиларда ва ёш қизчаларда кузатилади. Бу гуруҳ беморларда ташқи жинсий аъзоларда яллиғланишлар кузатилиб, шу соҳалар оғриғи, қичишиши ва қизишига шикоятлар бўлади. Кўрик пайтида катта ва кичик уятли лабчалар шиллиқ пардалари шиши, гиперемияси кузатилади, бу белгилар ўткир вульвит (vulvitis acuta) ва ўткир вестибулит (vestibulitis acuta)дан дарак беради. Уретра гиперемияси ва шиши, уни массаж қилинганидан сўнг йирингли ёки лойқа томчи ҳолидаги ажратмаси эса янги ўткир уретрит (urethritis recens acuta) юзага келганини тасдиқлайди. Кейин­чалик эса у ўткир ости уретрит (urethritis recens subacuta)га ўтади.