Адҳам ваисов

Кератолитик ва яллиғланишга қарши воситалар:
10% ли сут – салицил коллодий. Даволаш давомийлиги 30 кун, инфилтратив – йирингли формасида – 20 кунни ташкил этади.

Чуқур трихофития

(Trichophytia profunda)


Клиникаси. Чуқур трихофотия ўткир кечиб, замбуруғ соч фолликуласига тушгандан уни ва атрофидаги терининг йирингли яллиғланишини чақиради. Яллиғланиш ўчоғи бошида чегараланган, чуқур, ярим шарсимон шаклда бўлиб, устки қисмида катталашиб очилиб турган соч фолликуласининг тешикчалари кўриниб, улардан йиринг суюқлиги ажралиб туради. Клиник кўриниши карбункулни эслатади. Аста-секин яллиғланиш катталашиб диаметри 6–8 см га боради ва қараганда бошнинг соч қисмида тери сатҳидан 1–2 см гача кўтарилиб турган, ярим шарсимон, устида йирингли зич жойлашган фолликулитлар кўриниб, улардан кўп миқдорда сариқ рангли йиринг чиқиб туради. Шу даврда ўчоқ яқинидаги лимфа тугунлари (безлари) катталашиб кетади, беморда ҳарорат кўтарилади. Яллиғланган терида жойлашган сочлар ўрнидан енгил ажралади. Яллиғланган инфилтрат устидан босилса, соч фолликулалари тешигидан осонгина йиринг ажралиб асал арилар уясидан оқиб турадиган асални эслатади (kerion Celsi). Кейинчалик соч фолликуласи атрофияга учраб, яллиғланиш камаяди ва атрофи чандиқ ҳосил бўлади.
Бу терида янги сочлар бошқа чиқмайди.
Микроспория (Microsporia)

Микроспория қўзғатувчиси антропозоофил замбуруғи бўлиб, кўпроқ мактабгача ва мактаб ёшидаги болалар орасида тарқалади. Касаллик соғ одамга бемордан ҳамда касал ҳайвондан юқиб, силлиқ тери ва сочларни кўпинча юза жароҳатлайди.

Клиник белгилари. Силлиқ тери ва соч қисмини микроспорияси трихофитияни клиник кўринишини эслатиб туради. Лекин, касаллик бош­ланишдан теридаги жароҳатлар сони 2–4, катталиги ҳар хил бў­либ, кескин ажралиб устида асбестсимон майда кепакланиш билан қоп­ланади. Бу яллиғланган доғлар доирани эслатиб туради ва секин катталашиб доғ ўртасида янги зарарланиш пайдо бўлиб ўсади ва оқибатда янги кичикроқ доирага айланиб қолади ва ирис ҳолатини эслатади.
Яллиғланиш бошнинг сочли қисмида жойлашганда, юқорида келтирилган белгиларга, сочларнинг жароҳатланиб 5–6 мм узунликда синиши қўшилади. Айрим ҳолларда яллиғланиш кучайиб kerion Celsi га мос белгилар кўриниб қолади.