Adam ug’lı, o’z kewlin’di shad a’yle, Ashılsan’, ashıla berer bu du’nya

BU DU’NYA

1

Adam ug’lı, o’z kewlin’di shad a’yle,

Ashılsan’, ashıla berer bu du’nya.

O’tkenlerdin’ wa’siyatın yad a’yle,

Jıynasan’ shashıla berer bu du’nya.

Hadal miynet etip, tapsa du’nyanı,

Biyg’erezlik g’osh jigittin’ a’rmanı.

Hiyle qılsan’, aldayman dep sen anı,

Sumlıg’ın asıra berer bu du’nya.

Jurttan artıq jasayman dep eger sen,

Ta’sil qılsan’, o’zin’ azap shegersen’.

Tu’lkinin’ izinen tazı jibersen’,

Tuttırmay, qashıra berer bu du’nya.

Altın dep jıyg’anın’ temir tat bolıp,

Aqırında opıq jersen’ mat bolıp.

Sen quwsan’, ol naymıt perizat bolıp,

Ju’zlerin jasıra berer bu du’nya.

Bul du’nyanın’ bergen ashshı sabag’ın

Ha’r ko’rgende shu’kirlik qıl, toba qıl.

Ashıq Ayaz, ashıq ju’rsin qabag’ın’,

Qapılsan’ qapıla berer bu du’nya.

2

Bul du’nya «bes ku’nlik», «yalg’anshı» demek

Burıng’ılar aytqan so’zinde bardı.

«Asıg’adı bizden qalg’ansha» demek,

Biyopalıq ku’ler ju’zinde bardı.

Ta’n’irim bul du’nyanı joqtan bar etti,

Bendem shalqısın dep, lalazar etti.

Lekin g’apıl bende asqınlap ketti,

Ko’binde insap joq bazında bardı.

Du’nya dep, adamzat bir-birin qırg’an,

Shaytan g’ulg’ulası haq joldan urg’an.

Bul jerde jazıq joq du’nyada turg’an,

Ha’r ba’le adamnın’ o’zinde bardı.

Bul du’nya yalg’anshı emes shınında,

«Na’psin’di tıy» dep aytqan g’oy burında.

Bir qısım topıraqqa tolg’an son’ında,

Ash ko’zlik adamnın’ ko’zinde bardı.

Ashıq Ayaz, haq jolınan ju’rmese,

Bul du’nyanın’ go’zzallıg’ın ko’rmese,

Bul so’zge waqtında ma’ni bermese,

Ullı pushaymanlar izinde bardı.