9-sinf uchun “O‘zbekiston Respublikasi fuqaroligi” mavzusida yozgan ochiq dars ishlanmasi

III . Yangi mavzu bayoni:
Mavzu ustida ishlash natijasida:
– fuqarolik nima va u inson uchun qanday ahamiyatga ega ekanligini;
– fuqarolikka qabul qilish asoslari va uni to‘xtatish shartlarini bilib olasiz.
Reja:
1. Insonga fuqarolik nima uchun kerak?
2. Fuqaro va davlat.
3. Biometrik pasport. O‘zbekiston fuqarosining huquqiy maqomi.
1. INSONGA FUQAROLIK NIMA UCHUN KERAK?
Fuqarolik nimaligini bilasizmi? U yoki bu mamlakat fuqarosi bo‘lish inson uchun nimani anglatishi xususida o‘ylab ko‘rganmisiz?
O‘z mamlakatini tark etish va xorijda yashash uchun ko‘chib ketishni orzu qiluvchi bolalar uchrab turadi.
Guruhlarga bo‘lingan holda o‘zga mamlakatda yashashga «rozi» va «qarshi» bo‘lgan beshta asosiy sabablarni shakllantiring. Ularning har biri o‘zi haq ekanligini izohlasin.
Fuqarolik – bu insonning aniq bir davlat bilan huquqiy va siyosiy aloqalaridir. Davlat o‘z qonunlarida insonning huquqiy maqomini,ya’ni insonning davlatga, uning organlariga va boshqa shaxslarga nisbatan maqomini belgilaydi.
Fuqaro hisoblangan shaxs o‘z davlati hududida ham, xuddi shuningdek,undan tashqarida ham davlat muhofazasida va shafeligida bo‘ladi hamda fuqaroga nisbatan mustahkamlab qo‘yilgan barcha huquqlardan to‘laligicha foydalanadi. O‘z navbatida, fuqarolar o‘z davlati qonunlariga rioya etishlari, o‘z fuqarolik burchlari va majburiyatlarini bajarishlari shart.
Fuqaro nafaqat saylab qo‘yiladigan organlarga o‘z vakillarini saylashi,qolaversa, o‘zi ham ana shu organlarga saylanishi mumkin. Fuqaroligi bo‘lmagan shaxs bunday huquqqa ega bo‘lmaydi.