9- laboratoriya ishi Mavzu: Ma’lumotlar bazasida sertifikatlarni taqqoslash orqali modullarga qo‘shimcha foydalanish uchun ruxsatlar berish

Bir tomonlama autentifikatsiyalash bir tomonga yo‘naltirilgan axborot almashinuvini ko‘zda tutadi. Autentifikatsiyaning bu turi quyidagilarga imkon yaratadi:

- axborot almashinuvchining faqat bir tarafini haqiqiyligini tasdiqlash;

- uzatilayotgan axborot yaxlitligining buzilishini aniqlash;

- “takroriy uzatish” turidagi xujumni aniqlash;

- uzatilayotgan autentifikatsion ma’lumotlardan faqat tekshiruvchi taraf foydalanishini kafolatlash.

Ikki tomonlama autentifikatsilashda bir tomonliligiga nisbatan isbotlovchi tarafga tekshiruvchi tarafning qo‘shimcha javobi bo‘ladi. Bu javob tekshiruvchi tomonni aloqaning aynan autentifikatsiya ma’lumotlari mo‘ljallangan taraf bilan o‘rnatilayotganiga ishontirish lozim.

Uch tomonlama autentifikatsiyalash tarkibida isbotlovchi tarafdan tekshiruvchi tarafga qo‘shimcha ma’lumotlar uzatish mavjud. Bunday yondashish autentifikatsiya o‘tkazishda vaqt belgilaridan foydalanishdan voz kechishga imkon beradi.Ta’kidlash lozimki, ushbu turkumlash shartlidir. Amalda ishlatiluvchi usul va vositalar to‘plami autentifikatsiya jarayonini amalga oshirishdagi muayyan shart-sharoitlarga bog‘liq. Qat’iy autentifikatsiyaning o‘tkazilishi ishlatiladigan kriptografik algoritmlar va qator qo‘shimcha parametrlarni taraflar tomonidan so‘zsiz muvofiqlashtirishni talab etadi. Qat’iy autentifikatsiyalashning muayyan variantlarini ko‘rishdan oldin bir martali parametrlarning vazifalari va imkoniyatlariga to‘xtash lozim. Bir martali parametrlar ba’zida "nonces"-bir maqsadga bir martadan ortiq ishlatilmaydigan kattalik deb ataladi, hozirda ishlatiladigan bir martali parametrlardan tasodifiy sonlar, vaqt belgilari va ketma-ketliklarning nomerlarini ko‘rsatish mumkin. Bir martali parametrlar uzatishning takrorlanishini, autentifikatsion almashinuv taraflarini almashtirib qo‘yishni va ochiq matnni tanlash bilan xujum qilishni oldini olishga imkon beradi. Bir martali parametrlar yordamida uzatiladigan xabarlarning noyobligini, bir ma’noliligini va vaqtiy kafolatlarini ta’minlash mumkin.