7-tema: Maǵlıwmat xabar hújjetleri. Xızmet xatları Jobası

Kepillik xatı

Kepillik xatı arnawlı bir shárt yamasa wádeni tastıyıqlaw maqsetinde dúziledi. Xatlardıń bul túri qaǵıydaǵa kóre orınlanǵan jumıs ushın haq tólewde, jumıstıń atqarılıw múddeti haqqında, turaq jay menen támiyinlewde, jumısqa qabıllawda, atqarılatuǵan jumıstıń sapası haqqında kepillik beriw ushın tayarlanadı hám shólkem yamasa ayırım shasxlarǵa jiberiledi.

Kepillik xatları da basqa xat túrleri sıyaqlı, ádette, mákemeniń arnawlı is qaǵazına jazıladı. Xat tekstinde kepillik mánisi tómendegishe ańlatılıwı múmkin: «Tólewge kepillik beremiz», «tólewdi kepillikke alamız» sıyaqlı yamasa teksttegi gápti hár qıylı formada keńeytiw múmkin: Qurılıs jumısları juwmaqlanıwı menen bir ay múddet ishinde tiyisli tólemlerdi bank arqalı tólewge kepillik beremiz.

Kepillik xatı kárxana basshısı tárepinen imzalanadı. Finanslıq jumıslar menen baylanıslı bolǵan kepillik xatlarına, álbette, bas esapshı da qol qoyıwı zárúr. Geyde xat tekstinde «kepillik» sózi ulıwma isletilmesede, tekst mazmunınan onıń kepillik xat ekenligi sezilip turadı: Nókis qalası, t.Qayıpbergenov kóshesi, 7-jay, «Kitarlar dúnyası» dúkanı

Biziń adresimizge kórsetilgen ulıwma buyırtpanı tolıq alıw shárti menen «Bilim» baspasında baspadan shıǵarılǵan Abu Alı Ibn Sinanıń «Medicinalıq qollanbalar» kitabınnan eki júz nusqa jıberiwińizdi soraymız.

«Kitarlar dúnyası» dúkanı direktorı: (qol) M.B. Saparov

Bas esapshı: (qol) T. R. Alımov

Húrmetli Asan Abdullayevich!

«Algoritm» zavodı Sizge sher tillerin úyretiw boyınsha ámeliy sabaqlar ótiwiǹiz ushın barlıq sharayatlardı jaratıwǵa hám óz ara shártnama tiykarında haq tólewge kepillik beredi.

Zavod direktorı: (qol) O. N. Rasulov

Bas esapshı: (qol) R. S. Karimov

Soraw xatı

Juwap talap etetuǵın bunday xatlarda maǵlıwmatlar, hújjetler yamasa basqa zárúr zatlar soraladı. Bir ǵana xatta hár qıylı máselelerge tiyisli bir neshe sorawlar bolmawı kerek. Bayanlanıp atırǵan máseleler anıq hám ayqın bolıwı kerek. Tek sol jaǵdayda ǵana jollanǵan sorawǵa tez hám jetilisken juwap alıw múmkin.

Soraw xatı, ádette, eki tiykarǵı bólimnen: kirisiw hám juwmaqtan ibarat boladı. Kirisiwde soraw jiberiliw sebebi kórsetiledi, juwmaq bóliminde bolsa xat jollanǵan shólkemnen juwap talap etilip atırǵan máseleler kiritiledi.

Soraw xatları xatlar ushın mólsherlengen arnawlı is qaǵazlarında rásmiylestiriledi.

Shólkemler ortasında qollanıwshı soraw hám juwap xatlar teksti tómendegishe bolıwı múmkin.

“Qamısarıq” baǵshılıq ilimiy óndirislik birlespesi baslıǵı J.Jumanovqa!

«Shımbay hawazı» gazetası redakciyası “Qamısarıq” baǵshılıq ilimiy óndirislik birlespesiniń bir topar jumısshılarınan redaksiyaǵa kelip túsken usı shaǵım xatın kórip shıǵıw ushın Sizge jollaydı, tekseriw nátiyjeleri haqqında redakciyanı xabardar etiwińizdi soraymız.

«Shımbay hawazı» gazetası redaktorı: (qolı) I. Berdiyev.