7-mavzu: missionerlik va prozelitizm: tarix va bugun, targ’bot usullari reja

Missionerlikning oldini olishda mahallaning o‘rni nimada?
Missionerlik bilan shug‘ullanishga intilayotgan diniy tashkilotlar muayyan mahalla hududida joylashgan cherkov, ibodat uylari kabi o‘z maskanlariga ega. Noqonuniy diniy xatti-harakatlarni sodir etayotgan fuqarolar ham muayyan mahallada istiqomat qiladilar. SHunday ekan, ular mahalla aholisi orasida o‘z faoliyatlari haqida ijobiy tasavvurlarni shakllantirishga intilishlari tabiiy, albatta.
Missionerlar tomonidan:
- muhtoj oilalarning uylarni ta’mirlash, yong‘in yoki boshqa sababga ko‘ra zarar ko‘rgan xonadonlar sohiblariga yordam berish;
-mahalla hududidagi obodonlashtirish va ko‘kalamzorlashtirish, suv ta’minotini yaxshilash, yo‘llarni ta’mirlash ishlariga moddiy moddiy va amaliy ko‘maklashish;
- ibodatga qatnaydigan fuqarolarning paxta yig‘im-terimida qatnashishini ta’minlash, paxta yig‘im-terimi qatnashayotganlarga turli kiyim-boshlar tarqatishga urinishdek harakatlar sodir etilayotgani ham shunday xulosa chiqarish imkonini beradi.
Tahlil inson ongi va qalbi uchun kurash ana shunday nozik shakllarda olib borilayotgan bir sharoitda mahallalarimizda rais, diniy ma’rifat va ma’naviy-axloqiy tarbiya masalalari bo‘yicha maslahatchi lavozimlarida mehnat qilayotgan ayrim fuqarolarimizning missionerlikning asl mohiyati haqidagi bilimlari hamma vaqt ham etarli emasligini ko‘rsatmoqda.
Natijada, muayyan hollarda, ular o‘zlari bilmagan holda ularning faoliyatiga yo‘l ochib berishlari, prozelitlar bilan ishlashda diniy-ma’rifiy ishlar va tegishli targ‘ibot-tushuntirish tadbirlaridan ko‘ra ma’muriy uslublarga urg‘u berishlari kuzatilmoqda. Bunday harakatlar esa odatda teskari natija beradi. Xususan, e’tiqodda adashganlarning o‘zlarini “jabrdiydalar” sifatida his qilishiga, noto‘g‘ri qarashlari va faoliyatidan qaytishdan ko‘ra, ushbu yo‘lda mustahkam qolishlariga zamin yaratishi mumkin.
Umuman olganda, bugungi kunda mahallalarimizda rais hamda diniy ma’rifat va ma’naviy-axloqiy tarbiya masalalari bo‘yicha maslahatchi lavozimlarida faol va fidoyi, kuyunchak va jonkuyar insonlar mehnat qilayotganini ochiq yuz va toza qalb bilan e’tirof etish lozim. Ularni dinning inson va jamiyat hayotidagi o‘rni bilan bog‘liq bilimlar bilan qurollantirish, tegishli tajriba va malakaga ega bo‘lishlariga ko‘maklashish mutaxassis olimlar va soha uchun mutasaddi rahbarlarimiz oldida turgan eng dolzarb vazifalardan biridir.