7-Ma’ruza Mavzu: Ochiq kalitli kriptotizimlar Reja

7-Ma’ruza
Mavzu: Ochiq kalitli kriptotizimlar
Reja:

1. 
   Bir tomonlama funksiya
   
2. 
   Faktorlash muammosi
   
3. 
   Modul arifmetikasi
   
4. 
   RSA algoritmi
   
5. 
   Ochiq kalitli kriptotizimlardan foydalanish
   
6. 
   Ochiq kalitli kriptotizimlarda kalit uzunligi
   

Simmetrik kriptotizimlardagi mavjud muammolardan biri - maxfiy kalitni xavfsiz uzatish va saqlash. Quyida kalitlarni uzatish va xavfsiz saqlash bilan bog‘liq muammolar bartaraf etilgan, assimmetrik yoki ochiq kalitli deb ataluvchi kriptotizimlar xususida so‘z boradi.
Ochiq kalitli kriptotizimlarda ma’lumotlarni shifrlash bir kalit bilan amalga oshirilsa (ochiq kalit deb ataladi), uni rasshifrovkalash boshqa bir kalit (shaxsiy kalit deb ataladi) bilan amalga oshiriladi. Shuning uchun, ochiq kalitli kriptotizimlarda simmetrik kriptotizimlarda mavjud bo‘lgan kalitlarni taqsimlash muammosi bartaraf etilgan. Biroq, ochiq kalitli kriptografik tizimlarning ham o‘ziga xos muammolari mavjud.
Ochiq kalitli kriptotizimlarni yaratishda “qopqonli” bir tomonlama funksiyalarga asoslaniladi. Bu o‘rinda “bir tomonlama” iborasining ma’nosi - funksiya bir tomonlama osonlik bilan hisoblanadi. Biroq, ushbu funksiyani teskarisini hisoblash juda ham murakkab (ya’ni, hisoblash mumkin emas). Bu yerda “qopqonli” deyilishiga asosiy sabab, hujumchi ochiq axborotdan (masalan, ochiq kalit) shaxsiy axborotni (masalan, shaxsiy kalitni) tiklashda foydalana olmaydi. Mazkur bir tomonlama funksiyalarga misol sifatida faktorlash amalini ko‘rsatish mumkin.
Ya’ni, tub bo‘lgan ikkita p va q sonlarni generatsiyalash va N = p*q ni hisoblash oson. Biroq, N soni yetarlicha katta bo‘lganida uni ikkita tub sonning ko‘paytmasi shaklida ifodalash murakkab vazifa va u yuqori hisoblash imkoniyatini talab etadi.
Simmetrik kalitli shifrlarda ochiq matn P shifrlansa, shifrmatn C hosil bo‘ladi degan shartli belgilash kiritilgan edi. Ochiq kalitli shifrlash tizimlarida esa xabar M shifrlansa, shifrmatn C hosil bo‘ladi deb shartli belgilash kiritiladi
Ochiq kalitli kriptografik tizimlardan foydalanish uchun, B tomon ochiq kalit va unga mos bo‘lgan shaxsiy kalit juftiga ega bo‘lishi talab etiladi. B tomonning ochiq kaliti kimga ma’lum bo‘lsa, u ma’lumotni shifrlashi mumkin. Shifrlangan xabarni ochish faqat shaxsiy kalit egasi bo‘lgan B tomonga joiz.