6-modul. Podshipniklar. 20-mavzu. Sirpanish podshipniklari. Reja: Umumiy ma`lumotlar

6-modul. Podshipniklar.
20-mavzu. Sirpanish podshipniklari.
Reja:
1.Umumiy ma`lumotlar.
2. Sirpanish podshipniklari.
3. Podshipniklarning ishlash sharoiti va yemirilishi.
4. Suyuqlikda ishqalanishni ta`minlaydigan asosiy shartlar.


Ushbu mavzuni o’zlashtirishdan maqsad: Podshipniklar haqida umumiy ma`lumotga ega bo’lish, podshipniklarni sanoatda qo’llanilishini o’rganish, sirpanish podshipniklari haqida tushunchaga ega bo’lish, podshipniklarning ishlash sharoiti va yemirilishi bilan tanishish, suyuqlikda ishqalanishni ta`minlaydigan asosiy shartlar bilan tanishish.
Tayanch iboralar: Podshipnik, sirnanish podshipniklari, chidamliligi, dumalash podshipniklari, podshipniklarning yemirilishi, suyuqlikda ishqalanishi, moy qatlami, nim chuqur, nim suyuqlik, sapfa, vkladish, qovushqoqlik, moy qatlamining qalinligi.

Podshipniklar val hamda o’qlarning shiplariga o’rnatilib, tayanch vazifasini o’taydi. O’q yoki val orqali tayanchga tushadigan kuchni bevosita podshipnik qabul qiladi. Mexanizmning foydali ish koeffisientini kamayib ketishdan saqlash uchun podshipniklardagi ishqalanishga sarflanadigan quvvatni iloji boricha kamaytirishga harakat qilish zarur.

Mashinaning ishlash qobiliyati va chidamliligi podshipniklarning sifatiga ko’p jixatdan bog’liq. Shuning uchun podshipniklar tanlash va ish jarayonida ularni kuzatib turish masalalariga aloxida e`tibor berish lozim.
Aylanayotgan val yoki o’q shiplari podshipniklarda ishqalanadi. Ana shu ishqalanishning turiga qarab, podshipniklar sirpanish podshipniklari bilan dumalash podshipniklariga bo’linadi.
Sirpanish podshipniklarida sirpanib ishqalanib, dumalash podshipniklarida esa dumalab ishqalanish sodir bo’ladi. Bundan tashqari, val o’qiga tik kuchlarni qabul qilish uchun mo’ljallangan podshipniklar radial podshipniklar deyiladi; val o’qi bo’ylab yo’nalgan kuchlarni qabul qilish uchun mo’ljallangan podshipniklar tirak podshipniklar deb, val o’qiga tik kuch bilan bir vaqtda uning o’qi bo’ylab yo’nalgan kuchlarni ham qabul qilish uchun mo’ljallangan podshipniklar esa radial-tirak podshipniklar deb ataladi.
Yuqorida aytib o’tilgan podshipniklarning hamma turi ham mashinasozlikda keng ko’lamda ishlatiladi.