6-боб. Операциядан олдинги тайёргарлик (беморни оптимизациялаш)

Даволаш самарадорлигини баҳолаш

Шошилинч жарроҳлик касалликлари билан оғриган беморларни операциясиз даволашнинг принципиал мақсади мутаносиб тўқима озиқланишини тиклашдан иборат. Ушбу якуний мақсад самараси физик текширув, соатбай диурез миқдорини ўлчаш, танлаб қилинган инвазив мониторинг натижалари ҳамда лаборатор маълумотларга асосланиб аниқланади.

Суюқлик ҳажмининг тикланиши билан ҳаётий муҳим белгилар ва периферик қон айланиши белгиларининг яхшиланишига ишониш мумкин бўлади. Гипотензиянинг, эс-хуш бузилишининг, тахипноэ ва тахикардияларнинг йўқолишини қисман ёки тўлалигича кузатиш мумкин. Постурал гипотензиянинг мавжудлиги айланиб юрувчи қон ҳажмининг сезиларли нуқсони борлигидан дарак беради. Эслаб қолинг: ётган ҳолатдан турган ҳолатга ўтганда одатда систолик артериал қон босими кўтарилиш, пульс босими катталашади. Агар бемор ўрнидан турганда пульс босими қисқарадиган бўлса, бу нарса постурал гипотензия мавжудлигидан дарак беради. Инфузион даводан сўнг панжа ва товон бармоқ ва тирноқларининг ҳарорати яхшиланиши, шунингдек, тери тургори изга тушишини кузатиш мумкин. Капиллярларнинг қонга қайта тўлиши тирноқ ёстиқчасидаги периферик қн айланишини аниқловчи синов усулидир. Тирноққа қилинган босим олингач, меъёрда тирноқ ёстиқчасининг ранги 2 сонияда ўз ҳолига келади. Суюқлик ҳажмини қайта тиклаш ушбу унча сезиларли бўлмаган периферик қон айланиш бузилишларини изга солади.


Соатбай диурез


Вентиляция, перфузия ва диурез – булар деярли ҳамма нарса дегани! (Мат Оливер)

Оптимизациялаш муҳтож касалларнинг ҳаммасининг сийдик пуфагига Фолей катетери ўрнатилиши шарт. Аниқроқ, тушунарлироқ қилиб айтадиган бўлсак, тўқима перфузияси ва суюқлик ҳажмини тиклашнинг мутаносиблиги билвосита соатбай диурез орқали аниқланади.

Сизнинг мақсадингиз беморнинг ҳар бир килограмм вазнига камида 0,5-1,0 пешоб ажралишига эришиш бўлиши керак. Бу кўрсаткич ўтказилаётган инфузион-ҳажмни тиклаш даво фонида тўқима перфузияси мутаносиблигини баҳолашнинг ягона, энг маъқул синов усули ҳисобланади.