6-боб липидлaр aлмaшинуви

Пальмитин кислотадан ёғ кислоталарнинг синтези
Ёғ кислоталарнинг узайиши. Эндоплазматик ретикулумда пальмитин кислотанинг узайиши малонил-КоА иштирокида боради. Реакциялар кетма-кетлиги пальмитин кислота синтезидагига ўхшайди, лекин бунда ёғ кислоталар ёғ кислоталар синтазаси билан эмас, балки КоА билан боғланган. Элонгацияда иштирок этувчи ферментлар нафақат пальмитин кислотаси, балки бошқа ёғ кислоталаридан ҳам субстрат сифатида фойдаланишлари мумкин, шунинг учун организмда нафақат стеарин кислота, балки кўп углерод атомли ёғ кислотлари синтезланиши мумкин.
Жигарда элонгациянинг асосий маҳсулоти — сте­арин кислота (С 18:0), лекин мия тўқимасида узун занжирли — С₂₀ дан С₂₄гача ёғ кислоталари синтезланиши мумкин, улар сфинголипид ва гликолипидлар ҳосил қилиш учун керак.
Нерв тўқимасида бошқа ёғ кислоталар – α-гидроксикислотлар синтези содир бўлади. Аралаш функцияга эга бўлган оксидазалар С₂₂ ва С₂₄ кислоталарни гидроксиллаб, фақат мияда аниқланадиган лигноцерин ва цереброн кислоталарни ҳосил қилади.
Ёғ кислоталар радикалларида қўш боғларнинг ҳосил бўлиши. Ёғ кислоталар радикалларига қўш боғларнинг киритилиши десатурация деб аталади. Одам организмида десатурация натижасида ҳосил бўлувчи асосий ёғ кислоталар — пальмитоолеин (С16:1А9) ва олеин (С18:1А9) кислоталаридир.
Ёғ кислота радикалларида қўш боғларнинг ҳосил бўлиши ЭРда молекуляр кислород, НАДН ва цитохром b₅ иштирокида боради. Одам организмида бўлган ёғ кислота десатураза ферментлари, қўш боғларни тўққизинчи углерод атомидан дистал ёғ кислота радикалларида, яъни углероднинг тўққизинчи ва метил атомлари ўртасида ҳосил қила олмайди. Шунинг учун ω-3 ва ω-6 ёғ кислоталари организмда синтезланмайди ва овқат билан албатта қабул қилиниши керак, чунки улар муҳим регулятор функцияларни бажарадилар. Ёғ кислота радикалида қўш боғ ҳосил қилиш учун молекуляр кислород, НАДН, цитохром b₅ ва цитохром b₅ ФАДга боғлиқ редуктазаси талаб этилади. Тўйинган кислотадан ажралаётган водород атомлари сув кўринишида ажралади. Бир атом молекуляр кислород сув молекуласига киради, бошқаси эса сувгача НАДН электронлари иштирокида қайтарилади, улар ФАДН₂ ва цитохром b₅ орқали ўтказилади.