6-боб липидлaр aлмaшинуви

Ёғ кислоталари синтези учун водороднинг асосий манбалари
Пальмитин кислота биосинтезининг ҳар бир циклида 2 қайтарилиш реакцияси содир бўлади, бунда водород донори вазифасини кофермент НАДФН бажаради. НАДФ ⁺ қайтарилиши қуйидаги реакцияларда боради:

• 
  глюкоза катаболизми пентозофосфат йўли оксидланиш босқичидаги дегидрирланиш;
  
• 
  малатнинг малик-ферменти билан дегидрирланиши;
  
• 
  изоцитратнинг цитозолдаги НАДФга боғлиқ дегидрогеназа билан дегидрирланиши.
  

Ёғ кислоталар синтезининг бошқарилиши
Ёғ кислоталар синтезини бошқарувчи фермент — ацетил-КоА-карбоксилаза. Бу фермент бир неча усуллар билан бошқарилади.
Фермент суббирликлари комплексининг ассоциация/диссоциацияси. Ацетил-КоА-карбоксилаза фаол бўлмаган шаклда бир неча комплекслардан иборат бўлиб, уларнинг ҳар бири 4 суббирликдан ташкил топган. Ферментнинг активатори — цитрат; у суббирликларнинг йиғилишини стимуллайди, натижада ферментнинг фаоллиги ортади. Ингибитор — пальмитоил-КоА; у комплексни диссоциациялайди ва ферментнинг фаоллигини пасайтиради.
Ацетил-КоА-карбоксилазанинг фосфорилланиш/дефосфорилланиши. Постабсорбтив ҳолат ёки жисмоний ишда глюкагон ва адреналин аденилатциклаза системаси орқали протеинкиназа Ани активлайди ва ацетил-КоА карбоксилаза суббирликлари фосфорилланишини стимуллайди. Фосфорилланган фермент фаол эмас, шунинг учун ёғ кислоталари синтези тўхтайди. Абсорбтив даврда инсулин фосфатазани фаоллайди, ва ацетил-КоА карбоксилаза дефосфорилланган ҳолатга ўтади. Сўнгра цитрат таъсирида фермент протомерларининг полимерланиши содир бўлади ва у фаолланади. Ферментни фаоллашдан ташқари цитрат ёғ кислоталари синтезида бошқа вазифани ҳам бажаради. Абсорбтив даврда жигар ҳужайралари митохондриясида цитрат тўпланади, унинг таркибида ацетил қолдиғи цитозолга транспорт қилинади.
Ферментлар синтезининг индукцияси. Узоқ муддат углеводга бой ва ёғлар кам бўлган овқат истеъмол қилиш инсулин секрециясини оширади, у ўз навбатида ацетил-КоА-карбоксилаза, ёғ кислоталар синтазаси, цитратлиаза, изоцитратдегидрогеназа ферментлари синтези индукциясини стимуллайди. Натижада углеводларни кўп истеъмол қилиш глюкоза катаболизми маҳсулотларини ёғларга айланишини тезлаштиради. Очлик ёки ёғларга бой овқатланиш ферментлар, ўз навбатида ёғлар, синтезини пасайишига олиб келади.