6-amaliy mashg`ulot. Standart, ularning turlari, ishlab chiqish tartibi va tasdiqlanishi

4-bosqich. Standartni tasdiqlash va davlat ro’yxatidan o’tkazish.
Ishlab chiquvchi-tashkilot standart loyihasini tasdiqlashga quyidagi hujjatlar bilan birga taqdim etadi:
– ilova xati;
– standart loyihasining oxirgi tahririga tushuntirish yozuvi;
– asosiy tadbirlar rejasining loyihasi;
– standart loyihasi 4 nusxada, bundan ikkitasi birinchi bo’lishi lozim;
– standart loyihasining kelishishganligini tasdiqlovchi asl hujjatlar;
– standart loyihasiga fikr-mulohazalar to’plami;
– kelishmovchiliklar to’g’risidagi ma’lumotnoma;
– elektron versiya;
Standartni tasdiqlagan idoraning qarori bilan standart tasdiqlanadi va amalga kiritiladi.
“O’zstandart” agentligi standartni davlat ro’yxatidan o’tkazadi.
Eksport uchun mo’ljallangan mahsulotga qo’shimcha talablar davlat ro’yxatidan o’tkazilmaydi.
Standart davlat ro’yxatiga 4 nusxada taqdim etiladi: asli, ikkinchi nusxa (dublikat) va ikkita nusxa.
Standartning ikkinchi nusxasi standart asliiga o’xshash bo’lishi va undan zarur sifatli nusxa olishni ta’minlashi kerak.
Standart davlat ro’yxatiga ikki tilda: davlat va rus tillarida taqdim etilishi lozim.
Standartga zarur bo’lganda kiritiladigan tuzatishlar qo’ldan qora tush, pasta, siyoh bilan aniq yozilishi, birinchi varaqning orqa betida izohlangan va rahbar (rahbar muovini) imzosi va ro’yxatdan o’tkazishga taqdim etgan idora (tashkilot) ning muhri bilan tasdiqlangan bo’lishi lozim.
Standart davlat ro’yxatidan ko’pi bilan 5 kun muddatda o’tkaziladi.
Standartni belgilash, standartni tasdiqlagan tashkilotdan qat’iy nazar, “O’zstandart” agentligi tomonidan amalga oshiriladi. Standart belgisi quyidagilardan iborat bo’ladi:
– hujjat indeksi – O‘z DSt
– ro’yxatga olingan tartib raqami;
– ikki nuqta bilan ayirilgan tasdiqlash yilining to’rtta raqami: masalan, O‘z DSt 789:1997
Standart asli, ikkinchi nusxasi va ikkita nusxasining birinchi betlarida ro’yxatga oluvchi idora ro’yxatga olgan idora nomi, sana va davlat ro’yxatidan o’tgan nomeri ko’rsatilgan shtamp bosiladi.
Standartning ikki nusxasidan birinchi nusxasi “O’zstandart” agentligida qoladi.
Standart asliyati va ikkinchi nusxasi ishlab chiquvchiga qaytariladi.