5-Mavzu: Biznes sub’yektlarning bankrotligi

5.5. Kelishuv bitimi va uni tuzish tartibi. Bankrot korxonani tugatish. Bankrotlikning soddalashtirilgan taomillari.

Iqtisodiy sud tomonidan bankrotlik to‘g‘risidagi ishni ko‘rib chiqishning har qanday bosqichida qarzdor va kreditorlar kelishuv bitimi tuzishga haqlidirlar. Kelishuv bitimini tuzish to‘g‘risidagi qarorni qabul qilish, uni tuzish tartibi, shakli va mazmuni, o‘ziga xos xususiyatlari, haqiqiy emasligi va oqibatlari qonunda belgilangan tartibda amalga oshiriladi.

Kelishuv bitimi iqtisodiy sud tomonidan tasdiqlanishi kerak, bu haqda bankrotlik to‘g‘risidagi ish yuritishni tugatish to‘g‘risidagi ajrimda ko‘rsatib o‘tiladi.

Tashqi boshqaruv jarayonida iqtisodiy sud tomonidan kelishuv bitimining tasdiqlanishi kreditorlar talablarining qondirilishiga joriy etilgan moratoriy hamda bankrotlik to‘g‘risida ish yuritishning tugatilishi uchun asos bo‘ladi. Agar kelishuv bitimi iqtisodiy sud tomonidan tugatishga doir ish yuritish davrida tasdiqlangan bo‘lsa, iqtisodiy sudning qarzdorni bankrot deb topish va tugatishga doir ish yuritishni boshlash to‘g‘risidagi qarori ijro etilmasligi kerak.