5-bob. Mehmondo’stlik industriyasida sayr tomoshalar va ko‘ngil yozish infratuzilmasi

Klublar. Klub o‘z a’zolari ijtimoiy faolligini rivojlantirish, ijodiy izlanishlarini ruyobga chiqishiga ko‘maklashish, madaniyat va bilim darajasini ko‘tarish maqsadida tashkil qilinadi. Klubga tashrif buyuruvchilar birgalikda dam oladilar, ko‘ngil ochadilar. Klub hamjamiyati uchun tashabbuskorlik, havaskorlik, jamoatchilik fikri va ongliligiga xosdir.

Klubda turli maqsadli, intizomli, irodali, qat’iyatli va boshlagan ishni oxiriga yetkazish kabi belgilarga qarab, shaxslararo aloqalar o‘rnatiladi va rivojlanadi. Muloqat chog‘ida odamlarda ijtimoiy faollik namoyon bo‘ladi. Klub bo‘sh vaqtni mazmunli o‘tkazish markazi bo‘lib maydonga chiqadi.

Klub rahbarlar va mutaxassislar tomonidan boshqariladi. Xodim pedagogik bilimlarni egallagan bo‘ladi, turli san’at turlariga mo‘ljal oladi.

O‘z vazifasini bajarish jarayonida xodim bo‘sh vaqtni o‘tkazishni tashkil etish usullari va nazariyasiga amal qiladi, odamlarni o‘zaro hamkorligini tashkil qilish usullari va yo‘llaridan faoliyatida izchil foydalanadi. Hissiy axborot berishning xilma-xil vositalari (jonli nutq, matnlar, ko‘rgazmali vositalar, turli - tuman san’at turlari) qo‘llaniladi.

Klub faoliyati hamisha ko‘p funksiyali harakterga ega. Kompleks va ixtisoslashgan klublarga ajratiladi. Kopleks klublar keng qiziqish doirasiga ega odamlarning muloqatlarini tashkil qilish uchun mo‘ljallangan. Bunday klublarning madaniy oqartuv faoliyati ijodkorlikni rivojlantirish, madaniy dam olishni ta’minlash, ko‘ngil yozishga qaratiladi, bunda tashrif buyuruvchilarning qiziqishlari bir xil emasligi hisobga olinishi zarur.