4-tema: Oqıwshılarda informaciya qabıllaw mádeniyatın qáliplestiriw. Tálim mekemeleriniń menejmenti. Xalıqaralıq bahalaw programmaları (Programme for the international assesment). Korrekcion pedagogika tiykarları

1. Esitiwinde kemshiligi bar balalar. Sóylew qábileti-quramalı ruwxıy is-háreket bolıp esaplanadı. Ol ruwxıy rawajlanıwdıń payda bolıwına hám balanıń kámil insan bolıp kamalǵa keliwine óziniń tásirin tiygizedi. Sóz esitiw organlarınıń óz-ara baylanısına tiykarlanǵan bolıp, átiraptaǵılarǵa eliklew jolı menen rawajlanıp baradı. Awızeki sóylesiwdiń payda bolıwında sózdi háreketke keltiriwshi analizator esitiw analizatorı menen bekkem baylanısta jumıs isleydi. Esitiw analizatorınıń rawajlanıwı bolsa kópshilik jaǵdaylarda sóylew ózgesheligine baylanıslı. Balanıń sóylew qábiletiniń ósip barıwı, seslerdiń aytılıwı fiziologiyalıq hám fonematikalıq esitiwdiń kamalǵa keliwi menen xarakterlenip qalmastan, eń áhmiyetlisi, óziniń hám átirapındaǵılardıń sózleriniń dúzilisi, dawıstıń quramın ajırata alıw qábileti menende xarakterlenedi. Sóz quramın seze alıwdan ibarat bul qábilet grammatikalıq hám leksikalıq komponentlerdiń rawajlanıwında da úlken áhmiyetke iye.
Eki signal sisteması (sóylew hám esitiw), sonday-aq túsinik hám sózdiń óz-ara baylanısta bolıwı aqılıy rawajlanıwdıń tiykarı bolıp tabıladı
2. Kóriw qábiletinde kemshiligi bar balalar. Tiflopedagogikada kózi ázzi balalar soqır hám ázzi kóretuǵın balalar bolıp, eki toparǵa bólinedi. Soqır balalardıń kóriw qábileti keskin kemeygen yaki kóz áynek taqqan jaǵdaydada kóziniń kóriw ótkirligi 0,04 ke shekem páseygen boladı. Ázzi kóriwshi balalarda kóriw ótkirligi 0,05 ten 0,04 ke shekem bolıwı múmkin. Usı toparǵa kiriwshi balalar átiraptı kóriw analizatorı arqalı sezedi.
Bul kemshilikler traxoma, sheshek, súzek, kóz tuberkulyozi, qızılsha, skarlatina hám basqa keselliklerdiń aqıbeti bolıwı múmkin.
Kózi ázzi balalar ushın mektepke shekemgi tárbiya mekemeleri, mektep-internatlar shólkemlestirilgen. Bul jerdegi jumıslar kompensaciya, korrekciya jónelisleri boyınsha ámelge asırıladı. Yaǵnıy balalarǵa kóz-áynek, linzalar taqtırıw yaki kóriw qábiletin korrekciyalawshı xirurgiyalıq operaciyalar islew jolı menen jaqsılaw isleri ámelge asırıladı.