3-mavzu oddiy ikki qismli shakl rivojlangan ikki qismli shakl

Rivojlantirilgan oddiy ikki qismli shakl
Rivojlantirilgan ikki qismli shakl deb ko‘lami va rivojlanishining murakkabligi bilan oddiy ikki qismli shakldan kengayib ketgan shaklga aytiladi. Rivojlantirilgan Ikki qismli shaklning eng farqli xususiyati shundaki, uning har bir qismi oddiy tuzilma emas, (davriya va jumla), balki yana ham kengroq rivojlanishga ega. Ayrim hollarda murakkab ikki qismli shaklga yaqqol ifodalangan davriy tuzilishiga ega bo’lgan, yetarli darajada murakkab asarlar kiritilishi mumkin. Ba'zida birinchi qismning oddiyligi saqlanishi bilan birga, ikkinchi qismdagi keng rivojlanish tufayli butun shakl rivojlantirilgan ikki qismli shakl xarakteriga ega bo’ladi.
Shunday qilib, oddiy va rivojlantirilgan ikki qismli shakllar oilasidagi farq nisbiydir, ammo o‘zining benihoya ifodasida yetarli darajada aniq, negaki, oddiy ikki qismli shakl nihoyatda lo‘nda boladi, rivojlantirilgan ikki qismli shakl esa ba’zan uncha keng ko’lamga erishadi.
Qismlarning rivojlanishi strukturaviy (tuzilish ) jihatdan ham bo’ladi. Bunda har bir asosiy bo’lm aniq ifodalangan davriya va ikki yoki uch qismli tuzilmalarni o’z ichiga oladi.Bunday shaklni murakkab yoki aniqrog’i, tarkibiy shakl deyish mumkin. Biroq, qismlarning rivojlanishi nostrukturaviy, nodavriy, nisbatan erkin ham bo’lishi uchrab turadi (bu qadimiy rivojlantirilgan ikki qismli shakllar uchun, ayniqsa, Bax prelyudiyalari uchun xosdir). Shunday qilib, rivojlantirilgan ikki qismli shaklning ikki xilini, ya’ni strukturaviy va nostrukturaviy (erkin) rivojlanishdagi shakllarni ajrata bilish kerak.
Asosiy qismlarning ajratilishi, ayniqsa, birinchi qismning takrorlash belgilari bilan qaytarilishida ta’kidlanadi. Shu bilan birga, ko'pincha ikkinchi qism ham takrorlanadi. Birinchi qism takrorlanmagan hollarda, uning oxiri rivojianishning vaqtinchalik yakuni bilan aniqlanadi. Uning belgilari; aniq ifodalangan kadensiyalash, sezura yoki harakatning to’liq to‘xtatilishidir.
Qismlarining chegaralari aniq bo’lmagan muttasilroq rivojlanish ham uchraydi. Biroq ikki qismli shakl haqida faqatgina rivojlanishdagi birinchi bosqich yakuni aniq namoyon bo’lib, keyin yangi ikkinchi bosqich boshlanishi kuzatilgandagina aytish mumkin.