3-ma-ruza pdf

Сайёрадаги энг совуқ жой 17 йиллик
излашлардан кейин топилди. 
Экологлар сайёрадаги
энг совуқ жойни топишди. Ушбу жойда ҳарорат минус 92-
94 даражагача пасаяди. Бунгача сайёрадаги энг совуқ
ҳарорат Восток тадқиқот станциясида қайд қилинган
бўлиб, у минус 89,2 даражани ташкил қилган.
The Epoch Times нашрининг хабар беришича, энг совуқ жой
Антарктидадаги Қиролича Мод ерининг шарқий қисмида
жойлашган муз қалқонининг чўққисидаги Аргус ва Фужи
гумбазларини боғловчи муз тизмасида жойлашган. У ерда
олимлар чуқурлиги 2 метрдан 4 метргача келувчи
ботиқликларни аниқлашган. Бу ботиқликларда минус 94
даражагача совуқ ҳаво тўпланади. Мутахассисларнинг
таъкидлашича, агар бундай ҳароратда эҳтиётсизлик қилиб
нафас олинса, совуқ уриш жароҳатлари олиш мумкин.
Экологлар Ердаги энг совуқ жойни 2003 йилдан бери Аква ва
Landsat 8 сунъий йўлдошлари ёрдамида қидириб келишган. 
Бунгача Ерда қайд қилинган энг совуқ ҳарорат минус 89,2
даража ҳисобланган. Бундай экстремал ҳарорат 1983 йилда
Антарктикадаги Восток станциясида қайд қилинган.
Ҳаво нега исиб кетмоқда: инсониятга қандай
хавф бор?
Сўнгги пайтларда дунё иқлими мисли кўрилмаган ўзгаришга юз
тутмоқда. Музликлар эрияпти, денгиз сатҳи кўтарилмоқда,
ўрмонлар ёниб кетмоқда, ёввойи ҳайвонлар ҳам жон сақлашга
тобора қийналмоқда. Афсуски, бу каби салбий ҳолатларнинг
ортида инсон омили турибди.

---

Табиат ҳам қўл қовуштириб тургани йўқ: инсон тўппончадан ўқ узса,
 у замбарак билан жавоб қайтаряпти.
Ортда қолаётган ҳафта бошида Женевада ўтказилган виртуал матбуот
анжуманида БМТ Жаҳон метеорологик ташкилоти (WМО) вакили Кларе
Нуллис йил бошидан бери олинаётган ўлчов натижаларига асосланган ҳолда,
2020 йилда шимолий яримшарда ҳарорат рекорд даражага кўтарилиши
мумкинлигини айтди. У коронавирус эпидемияси бу бўйича профилактика
чораларини кўришни қийинлаштиришини таъкидлар экан, аҳоли пунктлари ва
одамларни ҳимоя қилиш зарурлигини айтди. Ҳаддан ташқари юқори ҳароратга
тайёр туриш кераклиги ҳақида огоҳлантирди.