3-bob. Suv xo’jaligi qurilishida kapital qo’yilmalarni rejalashtirish asoslari

3.3. Melioratsiya ishlarini rivojlantirishni rejalashtirish
Melioratsiyani, xuddi shuningdek melioratsiya tashkilotlari ishlarini rivojlantirishni rejalashtirish uchun qishloq xo’jaligining melioratsiya qurilishi hamda ekspluatatsiya tashkilotlari xizmatiga bo’lgan talabni aniqlash asos bo’ladi.

Melioratsiyani rivojlantirish rejasini tuzishdan oldin mavjud iqtisodiy va texnikaviy iqtisodiy takliflarni, suv xo’jaligi balanslarini, melioratsiya bo’yicha bajarilgan ilmiy ishlarni tahlil qilish, qurilish tashkilotlarining mavjud quvvatlarini aniqlash chora tadbirlarini ko’rib chiqish kabi ishlar bajariladi.

Yerlarni melioratsiya qilish ob’ektlarni qurish navbati ularning iqtisodiy samaradorligiga qarab aniqlanadi. Agarda sug’orish melioratsiyasi ob’ekti quriladigan bo’lsa: har bir gektar qo’shimcha o’zlashtirilgan yer hisobiga olinadigan mahsulot birligi bilan ulushli kapital qo’yilmalarning miqdorini taqqoslash kerak.

Melioratsiya rejasini tuzishda birinchi navbatda kollektor va drenajlarga talab yo’q, yoki suvlarni yuqoriga ko’tarish uchun nasoslar qurishga talab qo’yilmaydigan ob’ektlar tanlanishi kerak.

Mahalliy suv resurslari bazasida sug’orishni rivojlantirish kerak. Yaylovlarga suv chiqarish zarur bo’lsa, birinchi navbatda suv chiqarilib, keyinchalik ishdan chiqib qolgan ob’ektlarni rekonstruktsiya qilish kerak.