3- amaliy mashg‘ulot

Elektron o‘quv qo‘llanmalar o‘quv axborotlarni multimedia vositalari orqali obrazli ko‘rinishda taqdim etish, har-xil ko‘rinishdagi rang, harakat, ovoz kabi elementlarni kiritish, o‘quv materiallarini qabul qilish jarayonini samaradorligini oshirish bilan birga o‘quvchilarga berilayotgan materiallarni tahlil qilish, taqqoslash kabi muhim sifatlarni rivojlantiradi.

Elektron qo‘llanmalar ma’ruza mazmunini boyitadi va yangi materiallar bilan to‘ldiradi, ularning yaratilishi hamda o‘quv jarayonida qo‘llanilishi ta’lim muassasalarida yagona lokal tarmoqqa va katalog tizimiga ulangan elektron kutubxonalar yaratish imkonini beradi.

O‘quv muassasalarida elektron o‘quv qo‘llanmalaridan foydalanish zamonaviy kompyuter va axborot texnologiyalar bilan jihozlangan sinflarda amalga oshiririladi. Elektron o‘quv qo‘llanmalari asosan o‘rganilayotgan mavzuga doir nazariy ma’lumotlar, amaliy misol, o‘quvchilar uchun mustaqil topshiriq, mustaqil ishlash bo‘yicha uslubiy ko‘rsatma va olgan bilimlarini tekshirish bo‘yicha nazorat hamda test savollaridan tashkil topgan bo‘ladi.

O‘quv jarayonida elektron qo‘llanmalardan foydalanish o‘qituvchi-professorlarning ish faoliyatini yengillashtirish, o‘quv jarayonini boshqarishni mukammalashtirish va uning samaradorligini oshirish bilan bir qatorda o‘quvchilarning yagona elektron katalog tizimi orqali mustaqil bilim olish, o‘rganish hamda shu mavzu bo‘yicha olgan bilimlarini tekshirish imkoniyatini yaratadi.

O‘quv jarayonida Internet tarmog‘idan o‘rganilayotgan mavzuga tegishli ma’lumotlarni izlab topish, savod o‘rgatish jarayoni uchun badiiy kitoblarni topish, o‘rgangan bilimlarini kengaytirish, va o‘qituvchining o‘zi o‘z ustida ishlashi uchun lozim bo‘lgan ma’lumotlarga ega bo‘lish, boshqa tajribali o‘qituvchilarning faoliyatini o‘rganish va shu asosida o‘quv jarayonini samarali tashkillashtirish va hokozalar uchun keng ko‘lamda foydalaniladi.