2O‘zbekiston respublikasi

O‘ZBEKISTON RESPUBLIKASI
OLIY VA O‘RTA MAXSUS TA’LIM VAZIRLIGI
I.О. Yakubоv, H.A. Hakimov
MAKROIQTISODIYOT-2
О‘zbekiston Respublikasi Oliy va о‘rta maxsus ta’lim vazirligi huzuridagi Muvofiqlashtiruvchi kengash tomonidan 5A230103-
Makroiqtisodiyot mutaxassislikligida tahsil olayotgan magistrantlar uchun o‘quv qo‘llanma sifatida tavsiya etilgan
TOSHKENT– 2019
©Yakubоv I.О., Hakimov H.A. Makroiqtisodiyot-2. O‘quv qo‘llanma. - Т.: TDIU, 2019. - 217 bet.
O’quv qo’llanma Toshkent davlat iqtisodiyot universiteti Kengashi qarori bilan chop etishga tavsiya etilgan.
Iqtisod fanlari doktori, professor
i.f.d., prof. B.Yu.Xodiev tahriri ostida
Ushbu o‘quv qo‘llanmada makroiqtisodiyot fanining asosiy tushunchalari, muammolari va makroiqtisodiy siyosat yuritishning asoslari bayon qilib berilgan. Jumladan, o‘quv qo‘llanmada makroiqtisodiy ko‘rsatkichlarni hisoblash usullari, makroiqtisodiy muvozanatning turli modellari, makroiqtisodiy siyosatning fiskal va monetar yo‘nalishlari, iqtisodiy o‘sish masalalari, tashqi savdo siyosatini yuritishning nazariy asoslari hamda usullari, to‘lov balansi, valuta kursi kabi mavzular joy olgan. O‘quv qo‘llanma oliy ta’limning “Makroiqtisodiyot”, “Strategik tahlil va tashxislash” hamda “Mintaqaviy iqtisodiyot” mutaxassisliklarida tahsil olayotgan magistrantlar uchun mo‘ljallangan bo‘lib, uning tarkibi “Makroiqtisodiyot-2” fanining o‘quv dasturi va ishchi o‘quv dasturiga mos keladi.

KIRISH

Zamonaviy taraqqiyot jarayonlari iqtisodchi kadrlardan makroiqtisodiy nazariya va eng zamonaviy makroiqtisodiy konsepsiyalar bilan yaxshi tanish bo‘lishni, makroiqtisodiy tahlil malakasiga, nazariy bilimlarni amaliyot bilan bog‘lash ko‘nikmalariga ega bo‘lishni talab etadi. Shu sababli ham makroiqtisodiy jarayonlarning kechishi qonuniyatlarini, makroiqtisodiy muammolarni, makroiqtisodiy siyosat yuritgan holda ularni yechish yo‘llarini turli modellar vositasida mantiqiy izchillikka amal qilgan holda o‘rganish dolzarb vazifadir.
Davlat iqtisodiy siyosatining nazariy asoslari sifatida tan olinadigan fanlar qatorida “Makroiqtisodiyot” fani alohida o‘rin tutadi.
“Makroiqtisodiyot-2” fani esa davlat iqtisodiy siyosatining ilmiy asoslanganligi va uning amaliy tomonlarini tadqiq etadi.
“Makroiqtisodiyot-2” fani mutaxassislik fanlar majmuasiga taalluqli bo‘lib, magistrantlar uni 1-kursda o‘rganishadi.
Bu dasturni amalda bajarish uchun magistrantlar bakalavr bosqichi umumkasbiy fanlar blokidagi “Makroiqtisodiyot” fanidan yetarlicha ma’lumotga ega bo‘lishlari lozim.
“Makroiqtisodiyot-2” fani “Makroiqtisodiy siyosat”, “Fiskal va monetar siyosatni muvofiqlashtirish”, “Loyiha boshqaruvi” va boshqa fanlarni o‘rganishda asos bo‘lib xizmat qiladi.
“Makroiqtisodiyot-2” fani bo‘yicha taqdim etilayotgan ushbu o‘quv qo‘llanma yuqoridagi vazifalarni hal etishda ilmiy-uslubiy manba bo‘lib xizmat qiladi.