2. Raqamli turizmning mazmuni va rivojlanish xususiyatlari O‘zbekistonda raqamli turizmni rivojlantirish salohiyati va hozirgi holati tahlili

3. O‘zbekistonda raqamli turizmni rivojlantirish salohiyati va hozirgi holati tahlili

O‘zbekiston Respublikasining sayyohlik salohiyati jadal rivojlanmoqda. So‘nggi yillarda mamlakat milliy iqtisodiyotining strategik tarmoqlaridan biri sifatida turizmni rivojlantirish bo‘yicha kompleks chora-tadbirlar izchil amalga oshirilmoqda, bu esa uning tez rivojlanishi, yangi ish o‘rinlarini yaratish, daromadlarni ko‘paytirish, aholi turmush darajasi va sifatini yuksaltirish, shuningdek, investitsion jozibadorligini oshirishga qaratilgan.

Shuni ta’kidlash lozimki, turizm sohasida raqamli transformatsiyaning muhim tendensiyalari paydo bo‘lmoqda va ushbu texnologiyalarning turizm mahsulotlari va xizmatlariga integratsiyasi raqamli turizmga olib boradigan innovatsion jarayonning asosiy elementi sanaladi.
Turizm sanoatining hozirgi holati ko‘p jihatdan Internet tarmog‘iga ulanish, tarmoq orqali taqdim etiladigan elektron tranzaksiyalar va xizmatlarga bog‘liq, shu munosabat bilan raqamli yechimlardan foydalanishni kengaytirish sayyohlik korxonalarini biznes ehtiyojlariga moslashtirish uchun zarur shartdir.
Shunga o‘xshash vaziyat iqtisodiyotning boshqa tarmoqlarida ham sodir bo‘layotganligi aniq, ammo shuni ta’kidlash kerakki, turizm sanoati o‘ziga xosligi bilan boshqa sohalardan ajralib turadi, shuning uchun bu yerda Internet texnologiyalaridan foydalanish zarurati ortib bormoqda.
Datareportal.com ning 2020 yil yanvardagi “Digital 2020” hisobotiga ko‘ra, 7.75 miliarddan iborat dunyo aholisining 59 foizi, ya’ni 4.54 milliardi Internet, 67 foizi (5.19 mlrd.) mobil telefonlari foydalanuvchisi sanaladi, hamda 3.80 miliard inson, ya’ni dunyo aholisining 49 foizi ijtimoiy medianing faol foydalanuvchisidir. O‘z navbatida bu raqamlar har yili tobora ortib bormoqda. Shu bilan birga, Internet foydalanuvchilari turli yoshdagi, turlicha daromadli va ijtimoiy mavqega ega bo‘lgan odamlardir. Shunisi qiziqki, Internet resurslaridan faol foydalanuvchilar orasida har yili ijtimoiy tarmoqlarda muloqot qiladigan va ma’lumot qidirish uchun Internetdan foydalanadigan keksa yosh odamlar ko‘payib bormoqda.