4-§. Ўзбекистон тарихини ўрганишнинг талабалар
фаолиятидаги ўрни
Маълумки, тарих фанини ўрганиш масаласи республикамизда давлат сиёсати даражасига кўтарилди. Чунки тарих инсоннинг ўзлигини англаши, ўзида юксак маънавиятни шакллантиришида муҳим ўрин тутади. Биринчи Президент Ислом Каримов таъбири билан айтганда, “тарихий хотирасиз келажак йўқ”. Ўзбекистон тарихини чуқур ўрганиш жараёнида қуйидаги билим ва кўникмаларга эга бўлинади:
- юртимиз заминида етишиб чиққан буюк алломалар, давлат арбоблари, саркардаларнинг мамлакатни адолатли бошқариш, жамиятда тинчлик ва осойишталикни сақлаш, инсонларда юксак маънавиятни шакллантириш борасидаги улкан ва қимматли илмий ва адабий меросини ўз онгига сингдириш ва ундан мамлакат мустақиллигини мустаҳкамлаш, юрт фаровонлигини ошириш, фуқароларнинг ҳуқуқ ва эркинликлари, қонуний манфаатларини ҳимоя қилишда фойдаланиш талабаларнинг муқаддас бурчидир;
- тарихни ўрганиш жараёнида жамиятда амалга оширилаётган хайрли тадбирлар туфайли юртда тинчлик ва фаровонлик таъминланиши, аксинча, ҳар қандай чуқур ўйланмай кўрилган чоралар мамлакатнинг сиёсий, иқтисодий беқарорлиги ва таназзулига сабаб бўлишини англайдилар;
- тарихий билимларни ўзлаштириш жараёнида улар ижтимоий-сиёсий жараёнларни таҳлил қилиш ва мустақил хулосалар чиқаришни ўрганадилар, уларга асосланган ҳолда воқеа-ҳодисалар оқибатини ва келажакни башорат қилиш кўникмасига эга бўладилар. Бу пировардида, талабалар ва ирригация ходимларининг тарихий тафаккурини шакллантиришда муҳим омил бўлади. Тарихий тафаккур, ўз навбатида, ўзликни англашнинг муҳим воситасидир;
- тарих халқларнинг озодлик, Ватан мустақиллиги учун олиб борган кескин курашлари жараёнида юзага келган. Аждодларимиз Ватан озодлиги йўлида жонларини фидо қилганлар. Ушбу мисоллар орқали талабалар фақат мустақил юртда инсон ҳуқуқлари ва эркинликлари ҳимоя қилинишига, улар тараққиёт, фаровонлик, адолат қарор топган шароитда юзага чиқишига ишонч ҳосил қиладилар. Бу эса пировардида ватанпарварлик, инсонпарварлик, адолатпарварлик каби туйғуларни шакллантиради;
- кишилик жамиятининг келажагини нафақат юксак иқтисодий тараққиёт, илғор технологиялар, балки юксак маънавият ҳам белгилаб бериши тарихий ҳақиқатдир. Биринчи президент Ислом Каримов бу борада шундай фикр билдирган эди: “...Инсонга хос орзу-интилишларни рўёбга чиқариш, унинг онгли ҳаёт кечириши учун зарур бўлган моддий ва маънавий оламни бамисоли парвоз қилаётган қушнинг икки қанотига қиёсласак, ўйлайманки ўринли бўлади”11;
- тарих юртда осойишталик, жамиятда барқарорликни таъминлаш, аҳолининг қонуний ҳуқуқ ва манфаатларини ҳимоя қилишга қаратилган чора-тадбирларни амалга ошириш жараёнидир. Ушбу тарихий тажрибани ўзлаштириш, жамиятда ишлаб чиқариш ва бошқарув ўртасидаги мувофиқликни билиш талабаларнинг бугунги амалий фаолияти учун аҳамиятлидир.
Дарҳақиқат, талабаларнинг Ўзбекистон тарихи фанини билиши нафақат уларнинг илмий дунёқараши ва тарихий тафаккурини бойитади, балки уларнинг амалий фаолияти учун ҳам зарурдир. Президент Ш.Мирзиёев “Камолот” ёшлар ижтимоий ҳаракатининг IV қурултойида сўзлаган нутқида: “Маълумки, тарихда халқимиз орасидан кўплаб буюк саркардалар етишиб чиққан. Ана шундай мард ва фидойи аждодларимизнинг ҳарбий соҳадаги бой мероси, мардлик ва жасурлик фазилатлари ёшларимиз учун ибрат мактаби бўлиб хизмат қилади,”12 - деб таъкидлади.
Таянч сўзлар: тарих, назария, методология, метод, услуб, даврлаштириш: ибтидоий жамият, ўрта асрлар, янги давр, энг янги давр.
Do'stlaringiz bilan baham: |