133 so 'z Go'zallikta'rifi

Aybsizlik prezumpsiyasi va afv

“O‘g‘irlikka guvohlik berganda, bu kishi falon narsani oldi, deyilur, o‘g‘irladi emas”.

“Muxtasar” kitobidan
Shaxsning jinoyat sodir qilganligi shubha tug‘dirgan hollarda yoki ayblanayotgan shaxsning aybi aniq isbotlanib, sudning qonuniy kuchga kirgan hukmi bilan tasdiqlangunga qadar uning aybsiz deb hisoblanishi aybsizlik prezumpsiyasi deyiladi.
Darhaqiqat, sharoit, vaziyat taqozosi bilan ishi sudga tushgan har bir ayblanuvchiga dabdurustdan, asossiz ravishda jinoyatchi deb qarash xatodir. Binobarin, aybsizlik prezumpsiyasi dastlabki tergov va sud jarayonini ochiq-oydin, oshkora hamda qonunga muvofiq ravishda olib borishni, ayblanuvchining jinoyatini og‘irlashtiruvchi holatlarnigina emas, balki aybni yengillashtiruvchi jihatlarini ham hisobga olishni nazarda tutadi.
Ko‘rinib turibdiki, aybsizlik prezumpsiyasi insonparvarlik, adolatlilik talabi bo‘lib, u odil sudlovni ta’minlashga, insonning sha’ni, mavqei, boshqalar oldidagi obro‘-e’tibori saqlanishiga xizmat qiladi. Mustaqillik yillarida inson, uning haq - huquqi va manfaatlari oliy darajaga ko‘tarilgan ekan, fuqarolarning erkinliklari qonun bilan qo‘riqlanishi mamlakatimizda odil fuqarolik jamiyati barpo etish uchun muhimdir.
(136 so‘z)
Shekspir dunyosi
“Ilm - mo‘minning yo‘qotgan narsasidir, uni qayerda topsangiz, olib egalik qiling”, - deyiladi Hadisi sharifda... Ilmlarning eng buyugi - adabiyot. Boshqa ilmlar daryo bo‘lsa, u dengiz, boshqa ilmlar dengiz bo‘lsa, u - ummon. Negaki, u - insonshunoslik fani. Inson faoliyatining barcha qirralariga doir hikmatlar unda jamuljam. Shekspir asarlari bunga misol. Ularda yo‘q mavzuning o‘zi yo‘q: tarix, falsafa, siyosat, iqtisod, axloq, ruhshunoslik, mantiq, huquq va hokazolar. Bu asarlar butun insoniyatning, shu jumladan, bizning ham bebaho boyligimiz. Farzandlarimiz ularni hamisha o‘qib, o‘rganishlari kerak... Badiiy tafakkur bo‘lmish haqiqiy adabiyot hech qachon qarimaydi, eskirmaydi. U xuddi bugun qog‘ozga tushirilgandek yarqirab, jaranglab turaveradi. Bizning o‘g‘il-qizlarimiz qaysi kasbni egallashlaridan qat’i nazar adabiyot o‘qishlari, bir qadar adabiyotchi bo‘lishlari shart.
Darvoqe, Shekspir ijodi - buyuk universitet, yuksak insoniylik ma’rifatidan saboq beradigan ilmgoh, teran ma’naviyat dunyosi...
(127 so‘z)