13-маьруза органик иссиқлик изоляцияси материаллари. Табиий органик хом ашё асосидаги материаллар. Полимер асосидаги материаллар. Энергия ва ресурс тежамкор, экологик тоза технологиялар. Хоссалари ва ишлатилиши

Фибролит плиталари ёғоч жуни ва ноорганик боғловчилар асосида олинади. Ёғоч жуни (узунлиги 200-500 мм, эни 2-5 мм ва қалинлиги 0,3-0,5 мм бўлган тола) ел, липа, осина, қарағайдан тайёрланган калта тўсинчаларни махсус станокларда ишлов бериб олинади. Минерал боғловчи сифатида одатда портландцемент ишлатилади. Ёғоч жуни ва боғловчи яхши ёпишиши учун қоришма таркибига калций хлорид минерализатор сифатида қўшилади. Фибролит плиталари ўртача зичлиги 300-500 кг/м³, иссиқлик ўтказувчанлиги 0,1-0,15 Вт/(м^.0С), эгилишдаги мустаҳкамлик чегараси 0,4-1,2 МПа. Плиталар 25, 50, 75 ва 100 мм қалинликда ишлаб чиқарилади.
Арболит плиталари (блоклари) қисқа толали органик тўлдиргичлар (ёғоч қипиғи, пайраха, ғўза пояси, каноп пояси, похол ва бошқ.) ва портландцемент ёки шлакишқорли боғловчилар асосида тайёрланади. Маҳсулот сифатини ошириш учун қоришма таркибига калций хлорид, суюқ шиша каби минерализаторлар қўшилади. Иссиқлик изоляцияси арболитнинг ўртача зичлиги 500 кг/м³ гача, конструктив-иссиқлик изоляцияси арболитники эса 700 кг/м³ гача бўлади. Арболитнинг сиқилишдаги мустаҳкамлиги 0,5-3,5 МПа, эгилишидаги чўзилишга мустаҳкамлиги 0,4-1,0 МПа, иссиқлик ўтказувчанлик коэффициенти 0,08-0,12 Вт/(м^.0С).
Ёғоч чиқиндилари ва минерал ёки органик боғловчилар асосида тайёрланган плиталар ва бошқа композицион материалларга ишлов бериш-арралаш, тешиш, мих қоқиш, силлиқлаш осон. Улар тўсиқ конструкцияларни, каркасли девор ва ёпмаларни иссиқлик изоляцияси учун ишлатилади.
Сотопластлар полимерларга шимдирилган гофриланган қоғоз листларни, шиша толали ва пахтали матоларни елимлаб тайёрланади. Сотопластларнинг иссиқлик изоляцияси хоссаларини яхшилаш учун ячейкалари мипора увоқлари билан тўлдирилиши мумкин. Сотопластлар одатда уч қатламли панелларнинг ўрта қисмига ишлатилади.
Қамиш плиталар қамиш пояларини махсус станокда пресслаб ва зангламайдиган сим билан кўндаланг йўналишда тикиб тайёрланади.Қамиш плиталари узунлиги 2400-2800 мм, эни 500-1500 мм, қалинлиги 30-100 мм ўлчамларда ишлаб чиқарилади. Плиталар ўртача зичлиги 175, 200 ва 250 кг/м³, иссиқлик ўтказувчанлиги 0,06-0,09 Вт/(м^.0С), намлиги (массасига кўра) 18% гача бўлади.
Қамиш плиталари қамиш кўп ўсадиган дарё, кўл атрофларида махаллий материал сифатида ишлаб чиқарилади. Уларни чиришдан сақлаш мақсадида антисептиклар билан, ёнишдан асраш учун антипиренлар билан ишлов берилади.
Қамиш плиталари лой, гипс ва бошқа сувоқлар билан яхши тишлашади. Улар каркас деворлар, ички пардадеворлар, кам қаватли бинолар шипини иссиқлик изоляциясида ишлатилади.