11-tema: Seminar, ámeliy hám laboravtoriya shınıģıwların ótkeriw texnologiyası

11-tema: Seminar, ámeliy hám laboravtoriya shınıģıwların ótkeriw texnologiyası. Seminar, ámeliy hám laboratoriya shınıģıwlarınıń bir-birinen parqı hám áhmiyetli tárepleri.
Joba:
1. Seminar shınıģıwların ótkeriw texnologiyası.
2. Ámeliy shınıģıwlardı ótkeriw texnologiyası.
3. Laboratoriya shınıģıwların ótkeriw texnologiyası.


Seminar shınıģıwların ótkeriw texnologiyası.
Seminar shınıģıwları-oqıw processin shólkemlestiriwdiń tiykarģı formasınan biri bolıp, oqıtıwshınıń qadaģalawı astında talabalar tárepinen teoriyalıq sorawlardı jámáátlik ráwishte úyreniliwin názetde tutadı.
Seminar shınıģıwları tálim beriw forması sıpatında antik dáwirge barıp taqalıwshı uzaq tarıyxqa iye. «Seminar» sóziniń ózi lotın tilindegi «seminarium» sózinen alınģan bolıp, baģban (nálshe otırģızıwshı) dep awdarıladı. Bul wazıypa oqıtıwshıģa talabalardıń sanasına jańa bilimlerdi ótkeriw hám olardı rawajlandırıw wazıypası menen baylanısqan bolıp, talabalar oqıtıwshıdan alģan bilimleri arqalı keleshekte erkin pikirleytuģın bilimlerin bayıtıp barıwģa talpınıwshı shaxs bolıp jetilisedi.
Seminar shınıģıwları oqıw processin shólkemlestiriwdiń basqa formaları menen úzliksiz baylanısqan bolıp, bular dáslep lekciya hám talabalardıń óz betinshe jumısları bolıp esaplanadı. Seminar shınıģıwlarına talabalardıń kásiplik tayarlıģı sapalılıģın belgilep beriwshi kurstıń tiykarģı temaları alıp shıģıladı.
Seminar shınıģıwınıń ózine say tárepin kórip shıģılıp atırģan temanıń sholınıwı hár bir talabanıń bir normada hám belsene qatnasıwına imkaniyat jaratadı.
Seminar shınıģıwınıń wazıypaları tómendegilerden ibarat:
-oqıw páni boyınsha talabalardıń bilimlerin bekkemlew, tereńlestiriw hám keńeytiw; intellektual wazıypa hám mashqalalardı ornatıw hám sheshimin tabıw kónlikpesin qáliplestiriw; talabalar menen óziniń kóz-qarasındaģı teoriyasın dálillew, sonday-aq, basqa pikirlerdi dálillew yamasa inkar etiw boyınsha qábiletlerin rawajlandırıp barıw; teoriyalıq jaqtan tayarlıq dárejesin kórsetiw; ádebiyatlar menen erkin islew kónlikpesin qáliplestiriw. Seminar shınıģıwlarınıń tómendegi kórinislerin parıqlaw múmkin.
Proseminar-birinshi kurs talabaların joqarı tálimde erkin islewdiń ózine say tárepi menen tanıstırıw, ilimiy ádebiyatlar menen islew kónlikpesin iyelewdi maqset etken. Talabanıń proseminarda islewiniń xarakterli elementi belgili bir temalarda referatlardı tayarlap keliwi, olardı oqıp beriw hám talqılawları hám oqıtıwshı tárepinen ádil bahalanıwı bolıp esaplanadı.
Seminar-seminar shınıģıwı kurstıń oqıw dástúri menen bekkem baylanısqan bolıp, onıń ayrıqsha, derlik tereńlestirilgen temaların úyreniwdi maqset etedi.