1-variant Temir-beton karkasli bir qavatli sanoat binolari montaji

1.Qurilish ishtirokchilari. Qurilish jarayonlari va ishlari.

Qurilish ishtirokchilari. Qurilish maxsulotini ishlab chiqarish jarayoni ishtirokchilarining o’zaro munosabatlari tizimi katta ahamiyatga ega bo’ladi. Qurilishda mavjud bo’lgan tizim ishtirokchilar zanjiri ko’rinishida ifoda etilishi mumkin, uning bir tomonida kapital qo’yilmalar (investitsiyalar), ikkinchi tomonidan – yaratilgan qurilish maxsuloti turadi. Investitsiyalarning xususiyatiga ko’ra ular davlat (byudjet) va xususiylarga ajratiladi. Qurilish maxsulotini yaratishda buyurtmachining manfaatlari – loyihani g’oyadan boshlab qurilgan ob’ektni foydalanishga topshirgunga qadar rivojlanishni buyurtmachi-quruvchi – loyihaning barcha ishtirokchilarini ishlarini muvofiqlashtirishni amalga oshiruvchi ixtisoslashgan tashkilot ifoda etadi, bunga qurilishga dastlabki ruxsat etuvchi hujjatlarni davlat organlari bilan kelishish, qurilish ustidan texnik nazorat o’rnatish, qurilgan ob’ektni foydalanishga topshirish kiradi. Buyurtmachi-quruvchi oldida turuvchi asosiy vazifalardan biri ob’ekt qurilishini investitsiyaga qadar tayyorlash hisoblanadi. Odatda pudratchi tashkilotlar qurilish va maxsus ishlarning barcha turlarini bajarishga qodir bo’lmaydilar va bunda ular ixtisoslashgan tashkilotlar – subpudratchi sanitariya-texnika, elektromontaj va boshqa ishlarni bajaruvchi tashkilotlar bilan shartnomalar tuzishadi.