1. Saylov huquqi fani predmeti, maqsad va vazifalarini batafsil muhokama qiling

6-bob. Hisobga olish va hisobdorlik
37. Saylovga ajratilgan mablag‘lar kelib tushishini hisobga olish Davlat budjeti daromadlari va xarajatlarini tasniflashning tegishli paragrafiga muvofiq amalga oshiriladi.
38. Saylov komissiyalari saylovga tayyorgarlik ko‘rish va uni o‘tkazish uchun ajratilgan mablag‘lardan foydalanish bo‘yicha operatsiyalarning budjet hisobini “O‘zASBO” dasturiy kompleksida belgilangan tartibda yuritadi.
39. Siyosiy partiyalar saylovoldi tashviqoti uchun ajratilgan budjet mablag‘larining hisobini alohida yuritadi.
40. Saylov kampaniyasi davrida ishlatilmagan mablag‘lar qoldig‘i saylov komissiyalari va tegishli hokimlik organlari, shuningdek siyosiy partiyalar tomonidan saylov natijalari e’lon qilingandan keyin besh kunlik muddatda MSKning shaxsiy g‘azna hisobvarag‘iga qaytariladi. Ushbu mablag‘lar jamlanib uch bank ish kuni mobaynida Davlat budjetiga qaytariladi.
Oldingi tahrirga qarang.
41. Siyosiy partiyalar saylovda ishtirok etishini moliyalashtirish uchun o‘ziga ajratilgan davlat mablag‘lari yuzasidan oraliq hisobotini saylov kuniga 5 kun qolguniga qadar Markaziy saylov komissiyasiga mazkur Yo‘riqnomaning 7-ilovasiga muvofiq taqdim etadi.
Saylov natijalari e’lon qilingandan keyin moliyalashtirilgan, foydalanilgan va qaytarilgan mablag‘lar harakati bo‘yicha hisobotlar:
a) Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan — Qoraqalpog‘iston Respublikasi Moliya vazirligiga, viloyatlar va Toshkent shahrining tegishli moliya bosh boshqarmalariga va MSKga yigirma kundan kechiktirmasdan mazkur Yo‘riqnomaning 8-ilovasiga muvofiq;
b) Qoraqalpog‘iston Respublikasi Moliya vazirligi, viloyatlar va Toshkent shahar moliya bosh boshqarmalari tomonidan — O‘zbekiston Respublikasi Moliya vazirligiga yigirma besh kundan kechiktirmasdan mazkur Yo‘riqnomaning 8-9-ilovalariga muvofiq;
v) siyosiy partiyalar tomonidan yakuniy hisobotni MSKga yigirma kundan kechiktirmasdan mazkur Yo‘riqnomaning 10, 10a, 10b, 10v-ilovasiga muvofiq;
g) MSK tomonidan — O‘zbekiston Respublikasi Moliya vazirligiga bir oydan kechiktirmasdan mazkur Yo‘riqnomaning 8 — 11-ilovalariga muvofiq hisobot ma’lumotlari jamlangan holda taqdim qilinadi.
(41-band O‘zbekiston Respublikasi Markaziy saylov komissiyasining 2021-yil 2-iyuldagi 1080-sonli qarori tahririda)
42. Siyosiy partiyalar o‘zining saylovda ishtirok etishini moliyalashtirish to‘g‘risidagi axborotni saylov yakunlari e’lon qilinganidan keyin bir oy ichida o‘z rasmiy veb-saytlarida va bosma nashrlarida e’lon qiladi.
43. Saylov o‘tkazish xarajatlari uchun budjet mablag‘laridan foydalanish bo‘yicha operatsiyalar hamda saylovlar yakuniga ko‘ra qabul qilingan tovar-moddiy boyliklarining hisobi saylov komissiyalari joylashgan hududlardagi tegishli hokimliklar, tashkilot va muassasalar buxgalteriyasi tomonidan alohida qonun hujjatlarida belgilangan tartibda yuritiladi va ular bo‘yicha MSK ga hisobot taqdim etiladi.
44. Saylov komissiyalari raislari va hokimliklar mablag‘lardan maqsadli foydalanish va ular yuzasidan o‘z vaqtida hisobot taqdim qilish uchun mas’uldir.